Шоми 13 июн дар театри зимистонаи шаҳри Сочи маросими натиҷагирӣ ва тақдими ҷоизаҳои “Кинотавр” – яке аз мӯътабартарин ҷашнвораҳои синамои Русия доир шуд. Шоҳҷоизаи “Кинотавр” аз байни 14 филм ин бор насиби филми “Хороший мальчик” (“Бачаи хуб”)-и коргардон Оксана Карас шуд. Кирилл Серебренников барои филми “Ученик” (“Шогирд”) беҳтарин коргардон, Константин Хабенский барои нақши асосӣ дар филми “Коллектор” ва Наталя Павленкова барои нақшаш дар филми “Зоология” беҳтарин ҳунарпешаҳои мард ва зан эътироф шуданд.
Ҷоиза барои беҳтарин навкорӣ (дебют)-ро коргардон Денис Шабаев барои филми мустанади “Чужая работа” (“Кори бегона”) ба даст овард. “Кори бегона”-и ин шогирди вафодори устохонаи Марина Разбежкина дар бораи шебу фарози зиндагии Фаррух Ғафуров ном муҳоҷире аз Тоҷикистон аст, ки орзуи ҳунарпеша шуданро дар дил дорад, вале талотуми рӯзгор ӯро ба қӯраи Русия андохтааст.
Ҷоизаро ба Денис Шабаев мунаққиди синамо Нина Зархи ва вазири фарҳанги Русия Владимир Мединский супурданд. Вазири фарҳанги Русия бо васфи филми “Кори бегона” гуфт: “Аз онҳое ки имрӯз ҷоиза мегиранд, фардову пасфардои синамои мо сахт вобаста аст. Барои навкор (дебютант) аз ҳама муҳим пеш рафтану аз чизе натарсидан аст.”
Денис Шабаев барои филми “Кори бегона” ҳамчун як бахши киноромани мустанади “Отверженные” (“Мардуми радди маърака”) дар “Кинотавр” ҷоизаи Гилдияи синамошиносон ва мунаққидони синамои Русияро ҳам ба даст овард.
Денис Шабаев рӯзи 14 июн дар як тамоси кӯтоҳ аз тариқи WhatsApp ба бахши тоҷикии Радиои Озодӣ гуфт, аз истиқболе, ки достони муҳоҷири тоҷик дар ҷашнвораи Сочи пайдо кард, хеле хушаш омадааст ва ду ҷоизаи ҷашнвораи мӯътабари “Кинотавр” ӯро барои сохтани бахшҳои нави киноромани “Мардуми радди маърака” ташвиқ ва рӯҳбаланд мекунад: "Ду ҷоизаи "Кинотавр" ба сари худ як чизи бузург аст. Барои як филми мустанад чунин дастовард ҳатто боварнокарданист."
“Кори бегона” моҳи апрел дар ҷашнвораи байналмилалии филмҳои мустанад Visions du Réel ("Нигоҳи воқеӣ") дар Нйони Швейтсария низ аз байни 180 филм сазовори ҷоиза “Барои беҳтарин дебюти навоварона” шуда буд.
“Кори бегона” достони зиндагии муҳоҷирон аз гӯшаҳои гуногуни дунё ва аз ҷумла аз Тоҷикистон аст, ки эҳтиёҷи рӯзгор онҳоро ба бозори кори Русия афкандааст ва аксари онҳо дар ин бозор на бо ихтисоси худ, балки корҳои сиёҳ ва аксаран барои ихтисоси касбии онҳо бегонаро анҷом медиҳанд. Денис Шабаев дар як сӯҳбати қабилаш бо Озодӣ гуфт, як далели “Кори бегона” ном гирифтани филмаш ҳамин аст.
Барои мисол, Фаррух Ғафуров дар дил орзуи ҳунарпеша шуданро дорад, вале дар маҳалли нави зиндагиаш – Новая Москва – маҷбур аст, ҳар кореро, ки пеш биояд, иҷро кунад. Падари Фаррух, ки иқтисоддон аст, дар Новая Москва посбонӣ мекунад ва модари ӯ бо вуҷуди дипломи ҳуқуқшиносӣ инҷо машғули роҳрӯбист. Падару модари намозхони Фаррух мухолифи ҳунарпеша шудани ӯянд, вале худи Фаррух бо вуҷуди мардикорӣ боз ҳам аз орзуи рӯзе ҳунарпеша шудан даст кашиданӣ нест. Ба ӯ ҳатто дар як филм иҷрои нақши хурди муҳоҷиреро месупоранд, ки ба куштор айбдор шудааст. Бо амри тақдир, дар ҷараёни наворгирии филми “Кори бегона” худи Фаррух ба ҳалокати як нафар дар садамаи нақлиётӣ айбдор шуд ва ба зиндон рафт. Баъди раҳоӣ ӯро “болои сӯхта намакоб” аз Русия ихроҷ ҳам карданд.
Аммо далели дигари “Кори бегона” ном гирифтани филми Денис Шабаев, ба гуфтаи худи коргардон, бархӯрди мардуми маҳаллии Русия аст, ки дар симои муҳоҷирон мардумеро мебинанд, ки гӯё ҷои кори онҳо ишғол мекунанд. Ӯ мегӯяд, тайи якуним соли таҳияи “Кори бегона” бархе ҳақиқатҳои ба чашми бақияи мардум нонамоёнро ошкор кард ва фаҳмид, ки “набояд ҳамаи муҳоҷиронро ба як ранг ва он ҳам бо ранги сиёҳ тасвир кард. Дар пушти қиссаи муҳоҷирати ҳар кадоми онҳо дарде, ғуссае, фоҷиае нуҳуфтааст.”
Денис Шабаев дар ин сӯҳбат ҳамчунин гуфт, дар ҷараёни таҳияи филмаш ду рӯи комилан мухталифи муҳоҷири тоҷикро дидааст: “Оне ки дар Душанбе ба қасди Русия савори ҳавопаймо мешавад, як нафари дар ҷомиаи худаш обрӯманд, то ҳадде бонуфуз ва соҳиби шарафу эътибор аст. Вале ҳамин одам, вақте дар Маскав ё ҳар шаҳри дигари Русия аз ҳавопаймо пойин мешавад, алакай комилан як нафари дигар аст. Ӯ зуд ба як гастарбайтери тарсхӯрда, беҳуқуқ ва дар муқобили таҳқиру паст заданҳои чӣ мардуми маҳаллӣ ва чӣ мақомоти гуногуни Русия хеле осебпазир табдил меёбад. Муҳоҷирон тайи ҳамагӣ чанд соати парвоз то Русия худро мешикананд, ғурури худро мешикананд ва ин як фоҷиаи хурде нест.”
Дар солҳои охир таваҷҷӯҳи коргардонҳои синамои рус ба масоили муҳоҷирон, аз ҷумла муҳоҷирони тоҷик афзоиш ёфтааст.
Аз ҷумла дар соли 2015 филми ҳунарии “Фирор аз Маскавобод” рӯи саҳна омад. Ин филми коргардони ҷавон Даря Полторатская қиссаи Ҳасан ном суханчини ФМС аст, ки ҳамватанҳои бесабтиномашро ба ин идора мефурӯшад, вале дар ниҳоят барои корфармоҳояш ҳамчунон бегона боқӣ монда, дар чашми ҳамватанҳояш баракс хоин менамояд.
Яке дигар аз филмҳои пуртамошобин даро бораи ҳаёти муҳоҷирон сериали “Гулчатай” буд, ки солҳои 2013 ва 2014 дар шабакаи телевизионии “Россия” намоиш дода шуд. Дар ин филм нақши қаҳрамони асосиро ҳунарпешаи тоҷик Сайёра Сафарӣ бозӣ кардааст.
Дар соли 2013 коргардони шинохтаи рус Лариса Садилова филми “Она”-ро ба бозор дароварда буд, ки аз рӯзгори занони муҳоҷир дар Русия ҳикоят мекард. Нақши асосии Майяро дар ин филм ҳунарпешаи ҷавони тоҷик Нилуфар Файзиева бозӣ карда буд.
Филми мустанади "Меҳмонон"-и коргардони рус Алексей Суховей, ки соли 2015 ба бзор даромад, аз тағйироте, ки муҳоҷират дар Русия дар зеҳну феълу рафтор ва табиати тоҷикон ба бор овардааст, қисса мекунад. Ин достони як гурӯҳи муҳоҷирон аз минтақаи Кӯлоби Тоҷикистон аст, ки дар як ҷангали Русия дарахтбурӣ мекунанд.
