Сафирони Иттиҳоди Аврупо рӯзи 19-уми феврал бастаи 16-уми таҳримҳоро мувофиқа кардаанд, ки аз 24-уми феврал ба иҷро медароянд. Дар ин бора Рикард Йозвяк, хабарнигори Радиои Аврупои Озод/Радиои Озодӣ гузориш додааст.
Ба иттилои оҷонсиҳои хабарии ҷаҳонӣ, таҳримҳои нави Иттиҳоди Аврупо марҳила ба марҳила манъи хариди алюминий аз Русияро пешбинӣ мекунад. Ҳамчунин маҳдудиятҳо барои содироти нафт аз Русия сахтар хоҳад шуд.
Таҳримҳо 73 киштии нафткашро низ ҳадаф қарор медиҳад, ки тахмин меравад Русия барои давр задани маҳдудиятҳо аз онҳо истифода мебарад. Ҳамчунин 13 бонк дар “рӯйхати сиёҳ” қарор хоҳанд гирифт.
Пештар лоиҳаи «Система»-и Радиои Озодӣ гузориш дода буд, ки дар бастаи нави таҳримҳои Иттиҳоди Аврупо, нисбати низоми интиқоли «Золотоя корона» ҳам маҳдудият ҷорӣ мешавад. Муҳоҷирони меҳнатӣ барои интиқоли маблағ аз ин низом зиёд истифода мебаранд.
Хабаргузориҳои ТАСС, «Лента.ру» ва чандин расонаҳои давлатии Русия ҳам аз сӯи Иттиҳоди Аврупо таҳрим мешаванд.
Аз замони оғози ҳамлаи бедалели Русия ба Укрина дар моҳи феврали соли 2022, Иттиҳоди Аврупо алайҳи Маскав таҳримҳои сангине ҷорӣ кардааст.