Доналд Трамп, раисҷумҳури Амрико, бар молу колои 185 кишвари ҷаҳон, аз ҷумла Тоҷикистон, таърифа (тариф, тарофа) ё боҷи гумрукӣ ҷорӣ кард. Таърифаҳои нав рӯзи 2-юми апрел эълон шуд ва Трамп ба ҳамин далел онро "Рӯзи озодӣ" номид. Ӯ чанд дақиқа пас аз суханрониаш фармони иҷроии таърифаҳоро имзо кард.
Раисҷумҳури Амрико пеш аз имзои фармон дар Кохи Сафед гуфт, "ман як фармони таърихиро имзо мекунам, ки таърифаҳои мутақобилеро бар кишварҳои саросари ҷаҳон ҷорӣ хоҳад кард". Трамп афзуд, "мутақобил ба ин маъно аст, онҳо ин корро бо мо анҷом медиҳанд ва мо бо онҳо анҷом медиҳем".
Вай изҳор дошт, ки таърифаҳои то 10-дарсадӣ бар ҳамаи колоҳои воридотӣ ба Амрико ва таърифаҳои бештар барои баъзе аз калонтарин шарикони тиҷоратии ин кишвар ҷорӣ хоҳад шуд.
"Мо тақрибан нисфи маблағеро, ки аз мо мегиранд ё аз мо гирифтаанд, аз онҳо дарёфт хоҳем кард," – афзуд ӯ. Ба гуфтаи Трамп, Иттиҳоди Аврупо бо таърифаҳои 20-дарсадӣ рӯбарӯ хоҳад шуд, Чин бояд 34 дарсад ва Ҷопон 24 дарсад бипардозанд.
Илова бар ин, Ветнам бо таърифаҳои 46-дарсадӣ, Ҳинд 26, Индонезия 32, Малайзия 24, Кореяи Ҷанубӣ 25, Тайланд 36, Тайван 32, Шветсия 31, Украина, Бритониё ва Тоҷикистон ҳар кадом 10-дарсадӣ рӯбарӯ хоҳанд шуд. Мексика ва Канада низ шомили таърифаҳои 25-дарсадӣ шудаанд.
Президенти Амрико афзуд, “ба назари ман, ин яке аз муҳимтарин рӯзҳо дар таърихи Амрикост. Ин эъломияи истиқлоли иқтисодии мост. Акнун навбати шукуфоии мост”.
Доналд Трамп ваъда дод, ки бар асари ин таърифаҳо, ҷойҳои корӣ дар Амрико дигарбора барқарор хоҳанд шуд. Ба гуфтаи раисҷумҳури Амрико, ӯ бо ин кораш, "аз коргарони амрикоӣ дифоъ мекунад".
Ҷорӣ кардани таърифаҳои нав, талоше барои тақвияти тавлидоти Амрико ва муҷозоти дигар кишварҳо гуфта шудааст, ки ба бовари Трамп, солҳо шеваҳои тиҷоратии ноодилонаро таҳмил ё бор кардаанд.
Ба гузориши "Ассошиэйтед пресс", аммо бар асоси арзёбии бештари иқтисоддонҳо, ин ҳаракати пурхатар иқтисодро дар рӯбарӯи рукуд қарор медиҳад ва иттиҳодҳо ва паймонҳои чанд даҳаи охирро аз байн мебарад.
Ин гузориш меафзояд, ки ин сиёсатҳои Трамп мумкин аст, боиси кунд шудани рушди иқтисод шавад, зеро масрафкунандагон мумкин аст бо афзоиши шадиди қимати мошин, либос ва дигар молу коло рӯбарӯ шаванд.
Бахше аз хароҷот акнун ба харидорон ва масрафкунандаҳо мегузарад ва тибқи пажӯҳиши яке аз донишгоҳҳои Амрико, тахмин зада мешавад, ки таърифаҳои ҷаҳонии 20-дарсадӣ барои ҳар хонаводаи миёнаҳол, 3400 то 4200 ҳазор доллар хароҷоти иловагӣ дар пай дошта бошад.
Интизор меравад, ин таърифаҳо, монанди таърифаҳои 25-дарсадӣ бар вориди мошин аз Чин бошад. Ҳукумати Доналд Трамп ҳамчунин бар кишварҳое, ки аз Венесуэла нафт ворид мекунанд, боҷ ҷорӣ кардааст ва ният дорад бар воридоти дору, чӯб ва мис таърифаҳо ҷорӣ кунад.
Мушовири тиҷоратии Кохи Сафед пешбинӣ кардааст, ки таърифаҳои нав солона 600 миллиард доллар даромад меоранд, ки бузургтарин афзоиши молиёт аз замони Ҷанги ҷаҳонии дувум хоҳад буд.