Як ҳавопаймои ширкати "American Airlines" бо 60 мусофир ва 4 сарнишин дар осмони шаҳри Вашингтон бо як чархболи низомӣ бархӯрдааст.
Хадамоти оташнишонии Вашингтон эълон кард, ки ҳавопаймои мусофирбарии кӯчак дар дарёи Потомак, наздик ба Фурудгоҳи миллии Роналд Рейган, дар берун аз пойтахти ИМА, сарнагун шуд.
Идораи пулис низ дар шабакаҳои иҷтимоӣ навишт, ки нерӯҳои он шоми чаҳоршанбе ба вақти маҳаллӣ амалиёти таҳқиқ ва ҷустуҷӯи худро оғоз кардаанд. Ба гуфтаи пулис, чандин ниҳод дар амалиёти ҷустуҷӯ ва наҷот иштирок доранд.
Ҳанӯз шумори талафоти эҳтимолии ин ҳодиса маълум нест, аммо Идораи ҳавонавардии федеролӣ гуфт, ҳавопаймо ба ширкати "American Airlines" тааллуқ дорад ва аз аёлати Канзас ба парвоз даромада буд.
Баёнияи Идораи ҳавонавардии федеролӣ мегӯяд, ки ин ҳавопаймо дар ҳоли наздик шудан ба майдони фуруд бо як чархболи Sikorski H-60 дар осмон бархӯрдааст.
Чархболи Sikorski H-60 ба артиши Амрико тааллуқ дорад.
Чанд дақиқа пеш аз ҳодиса, як сенатор аз аёлати Канзас дар шабакаҳои иҷтимоӣ навишт, ки ҳавопаймо бо ҳудуди 60 мусофир аз ин аёлат ба парвоз даромад.
Тибқи гузоришҳо, ин ҳодиса боиси он шудааст, ки Фурудгоҳи миллии Роналд Рейган ҳамаи парвозҳои худро муваққатан қатъ кунад.
Доналд Трамп, раисҷумҳури Амрико эълон кард, ки дар ҷараёни ҳодиса қарор гирифтааст ва вазъиятро зери назар дорад.