"Муин"-и тоҷик дар меҳмонии "Ситораборон"

июн 23, 2010

Фахриддини Малик аз овозхонони маъруфи тоҷик 2 апрели соли 1971 дар ноҳияи Ҳамадонии Хатлон таваллуд шудааст. Аз синфи 3 мактаби миёна бо мусиқӣ машғул аст. Донишгоҳи ҳунарҳои зебои Тоҷикистонро бо ихтисоси актёр ва коргардон хатм кардааст.

Ӯро аз поягузорони «сабки муинӣ», услуби хондани овозхони маъруфи эронӣ — Муин меҳисобанд. Бо овозхонони эронӣ, африқоӣ, араб, турк ва рус ҳамкорӣ мекунад. Ҳамзамон муаллиф ва барандаи барномаи «Маҳбуби дилҳо» дар шабакаи якуми телевизиони Тоҷикистон аст.

То ба ҳол 7 албомаш нашр шудааст. Дар Туркия, Эрон, Имороти муттаҳидаи Араб, Русия ва Қазоқистон консерт баргузор кардааст. Консерти ояндааш дар хориҷи кишвар дар Олмон барпо мешавад.
Оиладор, соҳиби се фарзанд.