Ҳайатҳои Тоҷикистону Қирғизистон хостанд, ки "фоҷиа дигар такрор нашавад"
Ҳайатҳои Тоҷикистону Қирғизистон бо имзои протоколи иборат аз чаҳор банд дар мавриди оташбаси доимӣ ва берун бурдани нерӯҳо аз хатти марз ба мувофиқа расидаанд.
Мулоқоти ҷонибҳо дар пайи муноқишаи хунине, ки аз ду ҷониб даҳҳо куштаву захмӣ бар ҷой гузошт, рӯзи 1-уми май дар вилояти Бодканд баргузор шуд. Ҳайатҳоро раиси Кумитаи давлатии амнияти миллии Тоҷикистон Саймуъмин Ятимов ва раиси Кумитаи давлатии амнияти миллии Қирғизистон Қамчибек Тошиев раҳбарӣ карданд.
Дар се рӯзи охир ин мулоқот ва созиши севуми ҳайатҳои Тоҷикистону Қирғизистон аст. Дар ҳар се маврид ҷонибҳо барои қатъи тирпарронӣ ва берун бурдани нерӯҳо ба мувофиқа расиданд, вале дар ду рӯзи гузашта мақомоту сокинони ду тараф якдигарро барои ҷамъоварии нерӯву техникаҳои ҳарбӣ дар марз муттаҳам карданд.
Хабарнигори Радиои Озодӣ аз ҷамоати Чоркӯҳи Исфара гузориш дод, ки рӯзи 1-уми май ва пас аз созиши ҷонибҳо чанд техникаи ҳарбӣ аз минтақаи наздисарҳадӣ ба маркази шаҳри Исфара ҳаракат кардааст.
Раҳбарони ҳайатҳои Тоҷикистону Қирғизистон пас аз хотимаи мулоқот дар суҳбат бо хабарнигорон муноқишаҳои хунинро дар сарҳади ду кишвар "фоҷиа" номиданд ва гуфтанд, ки “ин фоҷиа набояд бори дигар рух диҳад”.
Саймуъмин Ятимов, раиси Кумитаи давлатии амнияти миллии Тоҷикистон гуфт, “фоҷиае, ки дар ноҳияҳои наздисарҳадӣ рӯй дод, набояд ҳеч гоҳ такрор шавад. Бовар дорам, ки мо метавонем дар фурсати наздиктарин ҳамаи мушкилотро ҳал кунем, то мардуми мо мисли гузашта дар фазои дӯстӣ ва якдигарфаҳмӣ зиндагӣ кунанд."
Қамчибек Тошиев, раиси Кумитаи давлатии амнияти миллии Қирғизистон, гуфт, созиши иборат аз чаҳор банд бо дарназардошти манфиатҳои ду кишвар имзо шуд. Ӯ афзуд, "ҳоло мардуми мо рӯзҳои сахту даврони буҳрониро мегузаронанд. Дар ин шароит барои ҷонибҳо мулоқот кардану корро пеш бурдан бисёр сахт буд, вале бо дастури раҳбарони кишварҳо мулоқотро баргузор кардем. Барои пурра бас кардани муноқишаҳои мусаллаҳона ва берун бурдани нерӯҳо аз марз ба тавофуқ расидем."
Оғози музокироти ҳайатҳои Тоҷикистону Қирғизистон дар Бодканд
Гуфтугӯи ҳайатҳои Тоҷикистону Қирғизистон барои муайян кардани хатти марз, баъд аз зуҳри 1-уми май дар вилояти Бодканд оғоз шудааст. Ҳайати Тоҷикистонро раиси Кумитаи амнияти миллӣ Саймумин Ятимов ва ҳайати Қирғизистонро раиси КДАМ-и он кишвар Қамчибек Тошиев роҳбарӣ мекунанд.
Дафтари матбуоти ҳукумати Қирғизистон хабар дод, ки дар ҷараёни гуфтугӯ, ҷонибҳо вазъияти марз ва роҳҳои ба эътидол овардани онро баррасӣ мекунанд.
Ҷониби Тоҷикистон то ҳол дар бораи оғози гуфтугӯҳо хабаре надодааст.
Гуфтугӯи ҳайатҳои Тоҷикистону Қирғизистон дар пайи он сурат мегирад, ки рӯзҳои 28 ва 29-уми апрел марзи ду кишвар шоҳиди як муноқишаи хунин шуда буд.
Суҳбати Тоқаев бо раҳбарони Тоҷикистону Қирғизистон ва нигаронии Афғонистон аз муноқиша дар марз
Эмомалӣ Раҳмон, президенти Тоҷикистон бо Қосимҷомарт Тоқаев, президенти Қазоқистон дар бораи вазъ дар марзи Тоҷикистону Қирғизистон суҳбат кардаст.
Сомонаи президенти Тоҷикистон рӯзи 1-уми май хабар дод, ки дар ин суҳбат “муҳиммияти хоссаи дарёфти роҳҳои ҳалли ҳамаи мушкилоти мавҷуда тавассути музокирот ва муколамаи созанда таъкид гардид”.
Содир Ҷабборов, президенти Қирғизистон низ бо Қосимҷомарт Тоқаев суҳбат кардааст. Тоқаев дар ин суҳбат ба ҳалли осоиштаи баҳси марзӣ таъкид кардааст.
Раҳбари Қазоқистон дар суҳбат ба Ҷабборов гуфтааст, ки омодаи кумаки башардӯстона ба осебдидагони муноқишаи марзӣ ҳастанд.
Зоҳиран, вазъ дар марзи Тоҷикистону Қирғизистон нигаронии кишварҳои минтақаро ба бор овардааст.
Вазорати корҳои хориҷии Афғонистон низ аз вазъ дар марзи миёни Тоҷикистону Қирғизистон бо нашри як баёния изҳори нигаронӣ кардааст.
Дар ин баёния гуфта мешавад, ки Афғонистон хостори бо роҳи осоишта ва аз тариқи гуфтугӯ ҳал шудани вазъ дар марзи ду кишвар аст.
Радиои Озодӣ номи 15 қурбонии муноқишаи марзӣ бо Қирғизистонро маълум кард
МУҲАММАДУЛЛОҲ РАҶАБАЛИЗОДА, афсари 26 солаи дастаи таъиноти махсус (ОМОН)-и Вазорати корҳои дохилии Тоҷикистон;
ҶАСУРҶОН СУЯРҚУЛОВ, марзбон, сокини 28 солаи деҳаи Қалъачаи Азими ноҳияи Деваштич;
ҲАСАН АКБАРОВ, марзбон, сокини 31-солаи деҳаи Аловуддини ноҳияи Фархор;
САЛОҲИДДИН ГАДОЕВ, 28-сола, фармондеҳи яке аз дидбонгоҳи ноҳияи Мастчоҳ;
ШЕРАЛӢ РАҲМАТЗОДА, сарбози қисми марзбонии Исфара;
САФАР НАБИЕВ, сарбози қисми марзбонии Исфара;
НЕКРӮЗ ҒАФУРОВ, сарбоз, сокини деҳаи Даҳбеди ҷамоати Қаратоғи шаҳри Турсунзода.
БАХТОВАР МАҲМУДОВ, сокини деҳаи Наймани ҷамоати Сурхи шаҳри Исфара;
УМЕДҶОН ЮСУФОВ, сокини ҷамоати Овчӣ-Қалъачаи ноҳияи Бобоҷон Ғафуров;
ҲИКМАТУЛЛО МАҲКАМОВ, сокини ҷамоати Чоркӯҳ, 26-сола;
ИБРОҲИМХОН ҲОШИМЗОДА, сокини маҳаллаи Навободи ҷамоати Чоркӯҳ, 26-сола;
СОБИР ВАҲҲОБОВ, 51-сола, ҷамоати Чоркӯҳ;
МАНУЧЕҲР ҚАЛАНДАРОВ, 40-сола, ҷамоати Чоркӯҳ;
ДАЛЕР ЭШОНОВ, 33-сола, ҷамоати Чоркӯҳ;
ҲУСЕЙНҶОН ШАРОПОВ, ҷамоати Чоркӯҳ.