Бар асоси иттилои хадамоти муҳоҷирати Хатлон чанд рӯз қабл ду хонаводаи ӯзбактаборро ниҳодҳои масъули давлатии Ӯзбакистон аз ин кишвар ихроҷ карданд, ки феълан дар минтақаи ҷануби Тоҷикистон ба манзил ва ҷои кор таъмин шуданд. Маҳмадалӣ Собиров, мутахассиси хадамоти муҳоҷирати Хатлон мегӯяд, хонаводаҳои мазкур қаблан дар ноҳияи Шаҳритус ва шаҳри Сарбанд зиндагӣ мекардаанд ва бо шурӯи ҷанги шаҳрвандӣ дар Тоҷикистон иҷборан манозили зисти худро тарк намуда ба Ӯзбакистон муҳоҷир шудаанд:
"Гурезагонро аз назорати мақомоти амниятӣ гузаронида ва дар ноҳияи Шаҳритус ҷобаҷо кардем. Бозоров Қурбоналӣ, ки духтур буд, дар беморхонаи марказии ноҳия ба ҷои кор таъмин карда шуд ва ҳамсари ӯ Бозорова Латофат, ки муаллима буданд, дар як мактаби ноҳия ба кор таъминкарда шуд."

Ҷаноби Собиров афзуд, нафарони ихроҷшуда аз Ӯзбакистон бо худ танҳо шиносномаи замони шӯравии собиқ доштанд, зеро дар ин кишвар ба онҳо аз додани чунин як санади таъйидкунандаи шахсият, бо иллати қаблан маскуни Тоҷикистон будан худдорӣ кардаанд. Ӯ гуфт, яке аз ин хонаводаҳо панҷ ва дигаре чаҳор нафаранд, ки дар хонаводаи дуввумӣ ягон нафар мард нест.

Дар ҳамин ҳол, Гулсара Раҳимҷонова, хонуми 65 сола, сарвари яке аз ин хонаводаҳо, ки бо се духтараш аз Ӯзбакистон ихроҷ шудааст, гуфт:
"Моро аз Ӯзбакистон депортатсия карданд ва дар Тоҷикистон пазируфтанд. Дар ноҳияи Зафаробод мақомоти амниятии Тоҷикистон моро мавриди пурсиш қарор дода ба дунболи ин ҷои хоб дар меҳмонхона дода ва ҳар рӯз ду дафъа ба ғизо таъмин мекарданд. Бисёр хуб пазируфтанд, ташаккури зиёд. Пас аз ин гуфтанд дар куҷо мехоҳӣ зиндагӣ намоӣ, гуфтам танҳо дар шаҳри Сарбанд."

Хонум Раҳимҷонова, мегӯяд, ӯ дар Ӯзбакистон таваллуд шуда ва пас аз ба шавҳар баромадан ба Тоҷикистон омадааст, вале чун ба дунболи оғози ҷанги шаҳрвандӣ дар Тоҷикистон ба зодгоҳи худ паноҳ бурдааст, дар муддати даҳ сол, илова бар он ки манзили кӯчаке барои сарпаноҳӣ надоданд, ҳатто то рӯзҳои ахир ба таъқибу тафтиш гирифтор будааст:
"Дар бозор менишастам ва ҷиҳози кӯҳна мефурӯхтам ва зиндагиамон мегузашт. Дар хона ҳар нафар иҷора менишастем. Дар Ӯзбакистон кӯмаке накарданд моро. Кӯшиш мекарданд, ки ҳуқуқҳои моро поймол кунанд. Масалан, мо дар як манзил як ё ду сол зиндагӣ мекардем ва дар ҷои дигар чун хонаеро иҷора мегирифтем, дар зудтарин фурсат пулиси минтақавӣ меомад ва моро мавриди пурсуҷӯ қарор дода ҷарима мебаст. Солҳои аввал зиёд азиятамон намедоданд, вале дар чанд моҳи ахир боз такрори ҳамон корҳоро шурӯъ карданд."

Аммо ин дар ҳолест, ки Гулсара Раҳимҷонова мегӯяд,аз ӯ ва духтаронаш дар шаҳри Навоии Ӯзбакистон тақозо кардаанд, ки бояд онҳо дубора ба Тоҷикистон баргашта ва шиносномаи нав бигиранд ва ба дунболи ин, чунин як аснод ва ҳуқуқи шаҳрвандиро дар Ӯзбакистон ба онҳо хоҳанд дод. Вале хонум Раҳимҷонова ин иддаои мақомоти Ӯзбакистонро рад карда ва бо ин иллатаз ин кишвар ихроҷ шудааст. Аммо дар шаҳри Сарбанди Хатлон, ки қаблан мезистанд ва мариди нооромӣ манзили худро фурӯхтаанд, дар хобгоҳи омӯзишгоҳ ба ӯ ва хонаводааш як манзил дода, дар як мактаб ӯро ба омӯзгорӣ пазируфтанд.

Мунаввари Мунаварзод, коршиноси тоҷик мегӯяд, ихроҷи паноҳандагони собиқи Тоҷикистон аз Ӯзбакистон ба нооромиҳои ду моҳ қабли шаҳри Андиҷони ин кишвар, ҷиҳати андешидани чораҳои амниятӣ робита дорад. Вале ба гуфтаи ӯ, агар ин қабил паноҳандагони собиқ табаияти Тоҷикистонро аз даст надода бошанд, ҳукумати ин кишвар муваззаф аст дар ҳар мавқеъ аз онҳо пуштибонӣ ва мавриди зарурат кӯмак намояд:
"Ин нафарон¸ ки дар солҳои ҷанги шаҳрвандӣ ба Ӯзбакистон ҳиҷрат карда буданд, нахуст аз ҳама худро дар мақомоти марбутаи ин кишвар ҳамчун паноҳанда сабти ном накарда буданд ва мушкилҳои баъдиашон ҳам аз ҳамин сар зада буд. Дуввум ин ки Ҳукумати Ӯзбакистон ба ҳеҷ ваҷҳ намехоҳад, шаҳрвандони хориҷӣ, ба вижа Тоҷикистонро ба тобеияти худ бипазирад."

Нафарони аз Ӯзбакистон ихроҷ гардида иттилоъ доданд, ки мақомоти марбутаи шаҳри Навоии Ӯзбакистон тасмим гирифтаанд, дар моҳҳои оянда ҳудуди 15 хонаводаи аз Тоҷикистон ба ин кишвар паноҳбурдаро ихроҷ намояд, ки бештарини онҳо ӯзбактаборанд ва дар манотиқи мухталифи кишвар солҳои қаблӣ мезистаанд. Ва дар ҳамин ҳол ҳукумати Хатлон иттилоъ додааст, ки ҳудуди 30 хонаводаи дигар аз Туркманистон низ тасмими ба ин вилоят баргаштанро кардаанд ва мақомоти марбутаи вилоят бошад дар ин маврид аз омодагии худ дар мавриди расонидани кӯмак ба ин хонаводаҳо хабар додааст.

Чин барои молҳои воридотӣ аз Иёлоти Муттаҳида 84 дарсад боҷ ҷорӣ кард.

Ин иқдом рӯзи 10-уми апрел ба иҷро медарояд ва посух ба таърифа ё боҷҳоест, ки аз сӯйи Доналд Трамп, раисҷумҳури Амрико, ҷорӣ шуда, боис ба шиддат гирифтани ҷанги тиҷоратӣ миёни ду иқтисоди бузурги ҷаҳон гаштааст.

Таърифаҳои Амрико алайҳи Чин дар маҷмуъ ба 104 дарсад расид ва рӯзи 9-уми апрел ба иҷро даромад.

Вазорати тиҷорати Чин дар баёнияе гуфт, "агар Иёлоти Муттаҳида ба сахттар кардани маҳдудиятҳои иқтисодӣ ва тиҷоратӣ пофишорӣ кунад, Чин иродаи қавӣ ва василаҳои фаровоне дорад, ки чораҳои зарурӣ андешад ва то ба охир мубориза барад."

Нигарониҳо аз пайомади таърифаҳо боис ба "нооромӣ" дар бозори саҳом дар ҷаҳон шудааст, аммо ин ошуфтагӣ Трампро мутаассир накардааст. Вай баръакс гуфт, ки таърифаҳо "дору" ҳастанд ва аз ӯ мавқеи худ пас нахоҳад гашт.

Трамп рӯзи 8-уми апрел гуфт, кишварҳо "муштоқ"-и музокирот дар мавриди қарордодҳои тиҷоратии нав ҳастанд.

Скотт Бессент, вазири молияи Амрико, рӯзи 9-уми апрел чораи охири Чинро маҳкум кард. Ӯ дар мусоҳиба бо Fox Business Network гуфт, "мутаассифона, чиниҳо намехоҳанд биёянду музокира кунанд, зеро онҳо бадтарин хилофкорони низоми тиҷорати байнулмилалӣ ҳастанд."

Дар ҳамин ҳол, кишварҳои Иттиҳоди Аврупо дар Брюссел ҷамъ шуда, дар мавриди чораҳои мутақобил раъй доданд. Вашингтон ба молҳои Иттиҳоди Аврупо таърифаи 20-дарсадӣ ҷорӣ кардааст.

Радиои Аврупои Озод/Радиои Озодӣ тарҳи Иттиҳоди Аврупоро дид, ки аз 15-уми апрел ба иҷро медарояд ва тибқи он барои як зумра молҳои Амрико, аз ҷумла пӯлоду либосу хӯрок 25 дарсад боҷи изофӣ ҷорӣ шудааст.

Маъмурони милиса дар Кӯлоб талош кардаанд, ки як ҷавонро аз дохили бозори марказии шаҳр бо зӯр ба артиш баранд, аммо соҳибкорон монеъ шудаанд.

Ҳодиса рӯзи 8-уми апрел рӯй дод.

Дар наворе, ки ба дасти Радиои Озодӣ расид, яке аз маъмурон бо либоси мулкӣ мегӯяд, "ман шахсан барои бурдани ту омадаам. Бе даъватнома. Даъватномаро мон."

Кормандони милиса талош кардаанд, Амирҷон Бухориевро аз дукони модараш, соҳибкор Раҷаббӣ Одинаева ба артиш баранд.

Наздиконаш рафтори намояндагони мақомотро таҳқиромез хонданд. Дар иваз кормандони милиса ба дари дукони онҳо муҳр задаанд.

Азиз Бухориев, бародари Амирҷон, рӯзи 9-уми апрел ба Радиои Озодӣ гуфт, "мо сад дарсад розием, ки бародарам ба хидмат равад. Чаро дар ҷойи ҷамъиятӣ чунин карданд ва дукони моро бастанд? Мо андоз (молиёт) месупорем, зиндагиямон пеш меравад. Як гурӯҳ ҷамъ шуда, таҳқиромез мехоҳанд сарбоз гиранд. Ман хидмат кардаам ва бародарам ҳам ба артиш меравад. Инҳо бе даъватнома бо таҳқир ин корро карданиянд."

Як манбаъ дар Шуъбаи корҳои дохилии Кӯлоб бе зикри номаш ба Радиои Озодӣ гуфт, аз ин ҳолат хабар надоранд, аммо дастур гирифтаанд, ки дар доираи қонун дар сафарбар кардани ҷавонон ба артиш саҳм гузоранд.

Дар Тоҷикистон мавсими баҳории даъвати ҷавонон (аз 18 то 27-сола) ба артиш ҷараён дорад.

Мақомоти вилояти Хатлон рӯзи 1-уми апрел эълон карданд, ки нақшаи даъватро иҷро карданд, аммо ҳанӯз аз ҷалби маҷбурӣ ё бо зӯр ба артиш бурдани ҷавонон аз ин минтақа ва гӯшаҳои дигар шикоят мерасад.

Дар пайи фурӯ рафтани сақфи як клуби шабона дар Ҷумҳурии Доминикан 98 кас ҷон бохта, 160 нафар захмӣ шудаанд.

Ҳодиса рӯзи 8-уми апрел рух додааст.

Ба гузориши хабаргузориҳо, маъмурони наҷот ҳамчунон дар ҳоли берун овардани ҷасадҳои қурбониён аз зери харобаҳо ҳастанд.

Гузориш шудааст, ки сақфи бино дар вақти як консерт фурӯ рафт.

Теъдоде аз сиёсатмадорон, варзишгарон ва шахсони дигар дар консерт ҳузур доштанд.

Доминикан як ҷумҳурии ҷазираӣ аст, ки дар Амрикои Шимолӣ ҷойгир шудааст.

Дар ҳамлаи нерӯҳои Русия ба вилояти Днепри Украина 15 кас захмӣ шудааст.

Дмитрий Лисак, волии вилоят, гуфт, бесарнишинҳои Русия шаби 8 ба 9-уми апрел ҳамла карданд ва бинои баландошёна зарар дид.

Артиши Русия ҳамчунин ба вилоятҳои Харков ва Краматорск зарба задааст. Дар Харков ду кас захмӣ шудааст.

Дар ҳамин ҳол Вазорати дифои Русия хабар додааст, ки шаби 9-уми апрел бесарнишинҳо ба зиёда аз 10 минтақаи ин кишвар ҳамла карданд.

Ба ҳисоби Вазорати дифои Русия, 158 паҳпод бар фарози минтақаҳои Краснодар, Ростов ва Осетияи Шимолӣ нобуд шудаанд. Тасдиқи дурустии ин маълумот душвор аст.

Дар фурудгоҳҳои Владикавказ, Волгоград ва Грозний маҳдудият ҷорӣ кардаанд.

Светлана Герасименко, cиторашиноси украинӣ, ки нисфи зиёди умрашро дар Тоҷикистон гузаронидааст, 8-уми апрел дар Русия даргузашт.

Дар ин бора Пажӯҳишгоҳи астрофизикаи Академияи илмҳои Тоҷикистон хабар дод.

Светлана Герасименко 80 сол дошт.

Ӯ зодаи вилояти Киеви Украина буд ва соли 1973 барои кор ба Академияи илмҳои Тоҷикистон даъват шуд.

Светлана Герасименко боқии умрро дар шаҳри Душанбе гузаронд ва солҳо ситораҳои дунболадор ё шаҳобҳоро таҳқиқ мекард. Светлана Герасименко ва фазошиноси украинӣ Клим Чурюмов кашшофи як ситораи думдор буданд, ки баъдан бо номи Чурюмов-Герасименко сабт шуд.

Навори суҳбати Светлана Герасименко аз бойгонии Радиои Озодӣ:

Барои ҳавопаймои президенти Тоҷикистон дар Фурудгоҳи Душанбе ангар (hangar) ё маҳалли нигаҳдорӣ сохтаанд.

Радиои Озодӣ рӯзи 9-уми апрел қарори ҳукуматро дид, ки дар он омадааст, сохтмони ангар барои ҳавопаймои "Боинг 787-800 Дримлайнер" ба анҷом расида, комиссияи давлатӣ бояд онро қабул кунад.

Як муовини сарвазир роҳбари комиссия шуда, намояндагони қариб ҳама ниҳодҳо ба он шомил ҳастанд. Аммо дар ин санад гуфта нашудааст, ки маҳалли нигаҳдории ҳавопаймои раисҷумҳур бо чӣ қадар маблағ ва давоми чанд сол сохта шуд.

Ҳукумати Тоҷикистон дар соли 2023 ҳавопаймои "Боинг 787-800 Дримлайнер"-ро бо 92 миллион доллар аз Мексика харид. Ин навъи ҳавопаймоҳо асосан барои раҳбарони давлатҳо аст ва сарватмандоне, ки ҳавопаймои хусусӣ мехаранд.

Президент Эмомалӣ Раҳмон ин ҳавопайморо дар сафар ба минтақаҳо ва хориҷи кишвар истифода мекунад.

Раисҷумҳур пештар бо ҳавопаймоҳои ширкати “Сомон Эйр” парвоз мекард.

Хариди ҳавопаймои алоҳида барои президент вокунишҳои зиёд дар дохилу хориҷ ба миён оварда буд.

Як сокини Варзоб, ки барои ҷамъоварии гиёҳ ба кӯҳ баромада буд, ба ҷарӣ афтида, захмӣ шудааст.

Кумитаи ҳолатҳои фавқуллода мегӯяд, ҳодиса 7-уми апрел дар мавзеи Санги Фалахмони ноҳияи Варзоб рух дод.

Ба қавли манбаъ, марди 32-сола баъди ба ҷарӣ афтидан бо телефон ба наҷотдиҳандагон тамос гирифтааст. Наҷотдиҳандагон ин мардро аз ҷарӣ бароварда, ба беморхона интиқол додаанд. Дар хабари расмӣ омадааст, мард дар ҷойи ҳодиса хуни зиёд талаф додааст. Вазъи саломатиаш ҳоло маълум нест.

Ҳамасола дар фасли баҳор сокинони минтақаҳои куҳсори Тоҷикистон барои ҷамъоварии гиёҳ, аз ҷумла, чукрӣ ба кӯҳ мебароянд ва ин кор баъзан бо фоҷиа тамом мешавад.

Аз ҷумла, чанд рӯз пеш як сокини ноҳияи Дарвоз аз кӯҳ афтод ва ҷон бохт. Ба иттилои КҲФ, марди 34-сола, сокини деҳаи Паткунови ҷамоати деҳоти Қалъаи Хумб, субҳи 2-юми апрел бо мақсади ҷамъоварии чукрӣ ба кӯҳҳои наздики деҳа рафта буд. Ҷасади ин мард баъд аз зуҳри ҳамон рӯз аз ҷониби сокинони маҳаллӣ ёфт шуда, ба наздиконаш супурда шуд.

Кумитаи ҳолатҳои фавқулода аз шаҳрвандон дархост кардааст, ки то 11-уми апрел аз рафтани ба кӯҳ, шикор, ҷамъоварии ҳезуму гиёҳон ва чорвочаронӣ худдорӣ кунанд.

Идибеки Мардон, ки дар шабакаҳои иҷтимоӣ бо номи "Бохтарӣ" саҳифа дорад, ба як сол зиндон маҳкум шудааст.

Ҳукми Додгоҳи шаҳри Бохтар ҳафтаи гузашта содир шуда, то ҳол қувваи қонунӣ нагирифтааст. Ба ҳамин далел, намояндагони додгоҳ аз суҳбат дар ин бора худдорӣ карданд.

Аммо як манбаи огоҳ 9-уми апрел ба Радиои Озодӣ гуфт, додгоҳ Идибеки Мардонро дар "истифодаи зӯроварӣ нисбат ба намояндаи ҳокимият" гунаҳкор кард. Кодекси ҷиноии Тоҷикистон барои ин иттиҳом то 37 ҳазор сомонӣ ҷарима ва ё то 2 сол зиндонро пешбинӣ кардааст.

Маълум нест, ки "Бохтарӣ" то куҷо иттиҳомро қабул кардааст ва оё аз болои ҳукм шикоят мебарад ё не. Талошҳои Радиои Озодӣ барои сӯҳбат бо вакили дифоъ ва наздикони Идибеки Мардон бенатиҷа буд.

Идибеки Мардон моҳи феврали имсол баъди бозгашт ба Тоҷикистон дастгир шуда буд. Ӯ моҳи сентябри соли гузашта дар як навор Абдулмаҷид Муминзода, раиси шаҳри Бохтар ва наздиконашро дашном дода, таҳдид кард, ки наворҳои онҳоро пахш мекунад.

Баъд аз пахши он видео Идибеки Мардон аз Тоҷикистон рафт, вале бо дархости додситонӣ қарори ҳабси ӯ ғоибона аз сӯи додгоҳ содир шуда буд.

Идибеки Мардон дар шабакаҳои иҷтимоӣ борҳо аз мақомоти Тоҷикистон ситоиш карда, ба мухолифони ҳукумат дар Аврупо ҳамлаҳои лафзӣ мекард.

Зиёда аз 500 шаҳрванди Тоҷикистон як ҳафта боз дар гузаргоҳи Сагарчин дар сарҳади Қазоқистон бо Русия банд мондаанд.

Баъзе аз онҳо барои дароз кардани муҳлати будубош дар Русия вориди Қазоқистон шуда буданд, вале ҳоло марзбонони Русия иҷозаи даромадан намедиҳанд ва ҳам намегӯянд, ки иллаташ чист.

"Баъзе аз бачаҳо як ҳафта боз дар инҷо ҳастанд. 200 мошин ҳаст, нагузаштааст. Бинед, мо дар чӣ аҳволем. Узбекҳо гузаштанд, қирғизҳо гузаштанд, чун аз сафораташон одам ҳаст. Аз мо касе нест," -- гуфт як муҳоҷири тоҷик бо шарти фош нашудани номаш рӯзи 8-уми апрел.

Марзбонони рус ба муҳоҷирони тоҷик сабаби роҳ надоданашон ба хоки Русияро шарҳ намедиҳанд. Як намояндаи Қирғизистон ба муҳоҷирони ин кишвар дар ҳузури дигарон гуфтааст, ки дар сарҳад қочоқи нуриҳои менералӣ сабт шудааст ва ба ҳамин далел Русия назоратро сахт кардааст.

Дар сафорати Тоҷикистон дар Қазоқистон ба зангҳои Радиои Озодӣ посух надоданд.

Баъзе аз муҳоҷирони бандмонда аз Тоҷикистон бо мошинҳои шахсӣ ба Русия мераванд, вале бархеи дигар онҳое ҳастанд, ки ба хотири убури марз ва навсозии муҳлати будубош аз Русия ба Қазоқистон ворид шудаанд.

Аксар муҳоҷирони тоҷик барои тамдиди будубоши худ дар Русия бояд дар 90 рӯз як бор хоки ин кишварро тарк кунанд. Бештари онҳо ба Қазоқистони ҳаммарз бо Русия мераванд, то аз он ҷо дубора вориди Русия шаванд. На ҳамеша мақомоти рус ба бархеи онҳо иҷозаи бозгашт ба Русияро медиҳанд. Мақомоти Тоҷикистон ба чунин равишҳо дахолати ҷиддӣ намекунанд.

Видеоро дар инҷо бинед:

Муфтиёт ё Идораи мусулмонон дар Қирғизистон эълон кард, ки "ниқобу фаранҷӣ дар дин воҷиб нест" ва "занон барои напӯшидани он гунаҳкор дониста намешаванд".

Ин ниҳод рӯзи ҳаштуми апрел дар баёнияе ниқобро барои ҷомеаи Қирғизистон "падидаи бегона" хонд.

"Ин имкон вуҷуд дорад, ки баъзе аз бадкирдорон зери ниқоб худро хоҳар ва ё бародари мо нишон дода, мумкин аст, ба амнияти мардум таҳдид кунанд. Аз ин рӯ, муҳим аст, ки чеҳра боз бошад, то онҳоро шинохта тавонанд," – гуфта шудааст дар баёния.

Аз моҳи феврали имсол агар касе дар Қирғизистон бо ниқоб гардад ва ба дасти маъмурони милиса афтад, то 20 ҳазор сом ё 230 доллар ҷарима мешавад.

Дар кишварҳои дигари Осиёи Марказӣ, ба мисли Қазоқистону Тоҷикистон ва Узбекистон пӯшидани ҳиҷоб дар мактабу идораҳои давлатӣ манъ аст.

Мақомоти Осиёи Марказӣ таъкид мекунанд, ки либосҳои миллии онҳо ҳеч камие аз ҳиҷобу либосҳои дигари исломӣ надорад ва бар фармудаҳои шариат дар бораи либоси занон мувофиқ аст.

Мухолифон мегӯянд, манъи пӯшидани ниқоб занонро аз ҳаққи интихоби либос маҳрум мекунад. Ниқоб як навъ либосест, ки сару гардан ва дарозии қади занҳоро пинҳон медорад.

Украина дар робита ба ҳамлаи Русия ба Кривой Роҳ, ки боис ба кушта шудани 20 кас гардид, ҷаласаи фаврии Шӯрои амнияти Созмони Милалро талаб кард.

Андрей Сибиҳа, вазири корҳои хориҷии Украина, дар шабакаи "X" навишт, ҳамлаи Русия бо мушаки дурпарвоз ба Кривой Роҳ нуҳ кӯдакро кушт.

Мақомдори украинӣ навишт, Русия ба майдони бозии кӯдакон дар назди бинои истиқоматӣ зарба зад.

Ӯ афзуд, кишвараш ҷаласаи фаврии Шӯрои амнияти Созмони Милал ва нишасти вижаи Шӯрои доимии САҲА-ро дархост кардааст, то таваҷҷуҳро ба ҷиноятҳои Русия ҷалб кунад.

Андрей Сибиҳа навишт, Киев талаб дорад, ки рафтори Русия маҳкум карда шуда, Маскав террор алайҳи кӯдакони украинӣ ва мардуми мулкиро бас кунад.

Ҳамла ба шаҳри Кривой Роҳ, ки зодгоҳи Владимир Зеленский, раисҷумҳури Украина аст, шоми 4-уми апрел рӯй дод.

Дар ин ҳамла 20 кас, аз ҷумла нуҳ кудак кушта шуданд. Даҳҳо нафар ҳам захмӣ гаштанд.

Тоҷикистон ва Қирғизистон ба созиш расидаанд, ки шаҳодатнома ё парвонаи ронандагии ҳамдигарро эътироф мекунанд.

Радиои Озодӣ рӯзи 8-уми апрел бо матни созишнома шинос шуд.

Дар санад омадааст, ки шаҳрвандони Тоҷикистон ё Қирғизистон ҳангоми будубош дар хоки ҳамдигар бе супоридани имтиҳон шаҳодатномаи ронандагии худро иваз карда метавонанд.

Яъне, Тоҷикистон ҳуҷҷати ронандагони Қирғизистонро эътироф мекунад ва Қирғизистон ҳам ин корро бояд анҷом диҳад. Шарт танҳо ин будааст, ки шаҳрвандони ду кишвар бояд ҳуҷҷати ронандагии худро бо тарҷумаи забони давлатӣ ё русӣ пешниҳод кунанд.

"Дар сурати пайдо шудани шубҳаи марбут ба дурустӣ ё аслӣ будани шаҳодатномаи ронандагӣ, ки барои иваз кардан пешниҳод шудааст", мақомоти ду кишвар метавонанд аз тарафи дигар дуруст будани ҳуҷҷатро пурсад.

Тоҷикистон ва Қирғизистон баъд аз чанд муноқишаи хунин дар марз аз соли 2021 равобити тирае доштанд. Моҳи марти имсол роҳбарони ду кишвар созишномаро дар бораи таъйини хати марз имзо карданд ва сарҳадҳои ду тараф ба рӯйи ҳамдигар боз шуд.

Ширкати "Сомон Эйр" фуруди изтирории ҳавопаймоашро дар фурудгоҳи Алмато шарҳ дод.

Рӯзи 7-уми апрел наворе ба шабакаҳои иҷтимоӣ роҳ ёфт, ки дар он дида мешавад, ки ҳавопаймои "Сомон Эйр" бо мушкил фуруд меояд.

Ин парвоз рӯзи 5-уми апрел дар хатсайри Душанбе-Алмато анҷом шудааст.

"Сомон Эйр" дар хабарномае навишт, ки ҳангоми пойин шудани ҳавопаймо ба фурудгоҳи Алмато ногаҳон шамоли сахт вазид.

Ширкат гуфтааст, новобаста аз вазъи бади ҳаво, ҳамаи мусофирон сиҳат ба ҷойи зарурӣ расиданд.

Дар навори пахшуда ба шабакаҳои иҷтимоӣ дида мешавад, ки марде мегӯяд, "то ҳаминҷо ҳаво абр буд, ҳавопаймо ларзид".

Ҳамчунин дар навор садои занон ва кӯдакон шунида мешуд, ки зоҳиран тарсида буданд.

Дар хатсайри Душанбе-Алмато ширкатҳои "Сомон Эйр" ва "Эйр Астана" парвоз мекунанд.

Дар пайи ҳамлаҳои беисти Русия ба минтақаҳои ғайринизомии Украина, сафири Амрико бо Киев изҳори ҳамбастагӣ кард.

Изҳороти сафир як рӯз баъди он садо дод, ки Владимир Зеленский, президенти Украина, Вашингтонро барои "вокуниши суст" ба ҳамлаҳои маргбори Маскав танқид намуд.

Бридҷет Бринк рӯзи 6-уми апрел дар шабакаи "X" навишт: "Дар рӯзи мотами миллӣ, дар пайи ҳамлаи мушакии Русия ба Кривой Роҳ, ки боис ба кушта шудани 20 кас, аз ҷумла 9 кӯдак шуд, бо мардуми Украина изҳори ҳамбастагӣ мекунем."

"Мо ҳамдардии худро ба хонаводаҳо ва азизони тамоми қурбониён ва маҷруҳон иброз медорем," – афзуд ӯ.

Сафири Амрико дар Украина гуфт, "аз соати шашуними субҳ Киев ва минтақаҳои дигари Украина ҳамчунон зери ҳамлаҳои мушакии Русия қарор доранд. Садои таркишҳои сахт дар пойтахт ва гузоришҳое аз ҳамла дар чандин шаҳр шунида мешавад."

Дар ҳамин ҳол, Эммануэл Макрон, раисҷумҳури Фаронса, дар вокуниш ба ҳамлаҳои беисти Русия ба минтақаҳои ғайринизомии Украина, хоҳони "чораҳои қотеъ" шуд.

Чойхонаи тоҷикии "Роҳат" дар пойтахти Украина рӯзи 6-уми апрел дар ҳамлаи мушакии Русия қисман вайрон шудааст.

Чанд тоҷики муқими Киев рӯзи 7-уми апрел дар суҳбат бо Радиои Озодӣ гуфтанд, ки чойхона корношоям шуд ва дарҳояшро ба рӯи муштариён бастанд.

Ба гуфтаи онҳо, чанд мушаки Русия ба атрофи чойхона афтода, тирезаҳои онро шикаст ва дохили биноро хароб кард.

Соҳиби чойхона гуфт, дар фурсати зудтарин дубора кори он оғоз хоҳад шуд. Вай нагуфт, ки аз ин ҳамла чӣ қадар зиён дидааст.

Бори аввал нест, ки ин чойхона зиён мебинад. Моҳи феврал дар чунин ҳамлае чойхонаи "Роҳат" сӯхта буд.

Чойхонаи "Роҳат" бо пешниҳоди таомҳои миллӣ дар маркази Киев як макони маъруф барои тоҷикони муқими Украина ва баъзе аз сокинони маҳаллӣ дониста мешавад. Барои то сад муштарӣ ҷой дорад.

Дар аксҳо дар шабакаҳои иҷтимоӣ дида мешавад, ки сафорати Тоҷикистон дар Украина низ аксар чорабиниҳои фарҳангияшро дар ҳамин чойхона мегузаронад.

Видеоро дар инҷо бинед: