Ҷо Байден, муовини раиси ҷумҳури Амрико имрӯз бо сафари дурӯза ба Украина меравад, то бо мақомоти Киев дар робитаи ба бӯҳрони он кишвар дидору гуфтугӯ кунад.
Қарор аст оқои Байден дар ин сафар бо нахуствазир, раиси ҷумҳур ва бархе аз мақомоти олирутбаи Украина дидор кунад. Ба гуфтаи Кохи Сафед, Ҷо Байден бо намояндагони парлумони он кишвар аз аҳзоб ва манотиқи гуногун низ намояндагони созмонҳои ғайридавлатӣ низ дидор хоҳад кард.
Дар баёнияи Кохи Сафед дар ин маврид омадааст, дар ин дидорҳо ӯ дар мавриди талошҳои байналмилалӣ барои субот ва қувват бахшидан ба иқтисоди Украина, кӯмак ба украиниҳо барои эҷоди ислоҳот дар Қонуни асосии он кишвар, талошҳо алайҳи фасод ва баргузории интихоботи озод ва одилонаи раёсати ҷумҳурӣ" гуфтугӯ хоҳад кард.
Гузоришҳо дар бораи шумори қурбониҳо мухталифанд. Мақомоти Украина мегӯянд, як нафар кушта ва се тани дигар захмӣ шудаанд. Аммо шабакаи телевизионии "Россия 24" мегӯяд, дар ин ҳамлаи субҳи якшанбе 5 нафар - 3 тан аз ҷудоиталабон ва ду тан аз ҳамлагарон - ҷон бохтааанд. Раҳбари ҷудоиталабони маҳаллӣ Вячеслав Пономарёв гуфт, се тан аз посбонони посгоҳ ва як ҳамлагар ба ҳалокат расидааанд.
Дар ҳамин ҳол, вазорати дохилаи Украина аз аъзои собиқи нирӯҳои "Беркут", ки ба далели нақшашон дар саркӯби эътирозҳои зидди Виктор Янукович пароканда шудаанд, хостааст, то ба хотири ҳимоят аз Ватан ба нирӯҳои худдифоъ пайваста, алайҳи таҷовузи хориҷӣ биҷанганд. Вазорати дохила гуфтааст, "дирӯз Беркут ва нирӯҳои худдифоъ дар сангарҳои мухталиф буданд", вале дар идомаи даъваташ мегӯяд, "Модари мо Украина ҳоло беш аз ҳар вақти дигар ба кумаки шумо зарурат дорад."
Хабари даргириҳо дар Словянск дар ҳоле мерасад, ки рӯзи 17 апрел музокироти чоргона дар Женева бо ширкати вазирони хориҷаи Русияву Украинаву Амрико ва раҳбари идораи сиёсати хориҷии Иттиҳодияи Аврупо Кетрин Эштон ҷиҳати одӣ сохтани авзоъ дар шарқи Украина ба тавофуқ расиданд. Яке аз ин тавофуқот халъи силоҳи гурӯҳҳои ғайриқонунӣ ва ба моликонашон баргардондани биноҳои ишғолшуда буд. Вале ҷудоиталабоне, ки борва меравад, аз сӯи Русия раҳбарӣ ва ҳидоят мешаванд, ба дунбол изҳор доштанд, ки талаботи музокироти Женева барои онҳо нест, балки бояд пеш аз ҳама гурӯҳҳои қавмгарои украинӣ, назири “Правий сектор” таслими силоҳ кунанд.
Вазъи Украина аз поёни моҳи феврал, дар пайи суқути ҳукумати рӯ ба Маскави Виктор Янукович дар натиҷаи се моҳи эътирозҳо ба бӯҳрони амиқ фурӯ рафт. Русия бо истифода аз фурсат нимҷазираи Қрими Украинаро, ки беш аз нисфи аҳолиашро русзабонҳо ташкил медиҳанд, ишғол кардв а бо баргузории як райъпурсӣ Ҷумҳурии мухтори Қрим ва шаҳри Севастополро ҳамчун ду субъекти алоҳида ба қаламрави худ ҳамроҳ кард.
Виктор Янукович бо писараш Олександр
Ҳоло сарусадоҳое зиёд шудаанд, ки Яункович баъди ду моҳи дар Русия паноҳ бурданаш дар садади бозгашт ба Украина аст. Хадамоти амнияти Украина, ки ду рӯз пеш Олександр, писари калонии Януковичро тавассути Интерпол таҳти пайгарди байналмилалӣ қарор дод, гуфтааст, Януковичро дар сурати баргаштанаш дастгир хоҳанд кард. Алайҳи ӯ дар Украина чандин парвандаи ҷиноӣ боз карда, Киев ҳатто аз додгоҳи Гаага хостааст, то Януковичро барои нақшаш дар қатли даҳҳо эътирозгар ба ин додгоҳи байналмилалӣ бикашонад.
Ин иқдом ба вокуниши шадидан манфии ҳам мақомоти кунунии Украина ва ҳам кишварҳои Ғарб рӯбарӯ шуд. Амрикову Аврупо алайҳи Русия алакай як силсила таҳримот ҷорӣ карда, мегӯянд, дар сурати идомаи дахолатҳои Маскав дар умури Украина ҳалқаи таҳримоташонро боз ҳам тангтар хоҳанд кард.
Мақомоти Украина авҷ гирифтани ҷунбишҳои ҷудоиталабӣ дар вилоятҳои умдатан русзабони шарқи ин кишваррро марҳалаи дувуми сенарияи Қрим меноманд, вале мегӯянд, ин навбат аз якпорчагии Украина ба сароҳат дифоъ хоҳанд кард. Аз 15 апрел дар шарқи Украина амалиёти зиддитеррор шурӯъ шуда, ба ин манзур нирӯҳои изофӣ ба ин манотиқ эъзом шудаанд. Вале Русия Киевро аз ҳар навъ истифодаи нирӯ алайҳи русзабонҳо ҳушдор додааст.
