Дар пайи беҳтар шудани равобити Душанбе ва Бишкек, пайвандони як тоҷики зиндонӣ дар Қирғизистон озодии ӯро талаб доранд. Акмалҷон Исоев дар соли 2021 ва баъди як муноқишаи хунин дар марзи Тоҷикистон ва Қирғизистон боздошт ва 15 сол зиндонӣ шуд. Наздиконаш мегӯянд, ӯ бегуноҳ аст.
Шукуфа Исоева, хоҳари Акмалҷон Исоев, рӯзи 1-уми апрел ба Радиои Озодӣ гуфт, боз шудани марз ва хуб шудани робитаи Тоҷикистону Қирғизистон умеди онҳоро ба озодии бародарашон бештар кардааст.
“Чанд шаҳрванди Қирғизистон, ки дар Тоҷикистон зиндонӣ буданд, озод шуданд. Маълум, ки илоҷаш будааст. Хости мо фақат ҳамин аст, ки бародари маро ҳам аз зиндони Қирғизистон озод кунанд,” - афзуд Шукуфа Исоева.
Акмалҷон Исоев дар моҳи сентябри соли 2021 бо гуноҳи "убури ғайриқонунии марз", "қочоқи маводи мухаддир" ва "ғоратгарӣ" зиндонӣ шуд. Ҳамроҳ бо ӯ ду тоҷики дигари Қирғизистонро ҳам ба 8,5 сол зиндон маҳкум карда, пас аз даҳ моҳ онҳоро озод намуданд. Акмалҷон Исоев ҳамчунон дар зиндон мондааст ва талоши пайвандонаш барои озодии ӯ бенатиҷа аст.
“Барои бахшиши гуноҳ ба президенти Қирғизистон муроҷиат кардем, посухи рад доданд. Гуфтанд, ки аз се як ҳиссаи ҷазоро адо кунад, баъд дида мебароем. Ба мақомоти Тоҷикистон муроҷиат кардем, посух доданд, ки Акмалҷон шаҳрванди Қирғизистон аст ва мо ҳеч коре карда наметавонем,” - афзуд Шукуфа Исоева.
Акмалҷон Исоев 30 сол дошта, ба гуфтаи наздиконаш, ду фарзанд дорад. Исоев дар деҳаи Борбордуқи Қирғизистон зиндагӣ мекард.
Тоҷикистону Қирғизистон дар соли 2021 дар пайи ҷанҷолҳои марзӣ даҳҳо шаҳрванди якдигарро ба гумони ғайриқонунӣ гузаштан аз сарҳад ё айбномаҳои дигар боздошт карда, дертар қисмеро табодул намуданд.
Аз ҷумла Абдурозиқ Абдуқаҳҳоров ва Аскар Юнусов, ки аз сӯи мақомоти Қирғизистон боздошт шуда буданд, ба Тоҷикистон супорида ва дертар озод шуданд. Мақомоти Қирғизистон соли 2022 гуфтанд, Тоҷикистон 11 шаҳрванди боздоштшудаи Қирғизистонро ба кишварашон баргардондааст.
Рӯзи 13-уми март созишномаи марзи байни Тоҷикистону Қирғизистон дар маросиме дар шаҳри Бишкек миёни раҳбарони ду кишвар, Эмомалӣ Раҳмон ва Содир Ҷабборов, имзо шуд. Марзҳои ду кишвар, ки аз соли 2021 баста буданд, боз шуданд.
