Тақрибан наздикии шом фурудгоҳи шаҳри Душанбе ба қабули ҳавопаймоҳо шурўъ кард. Парвозҳо низ аз сар гирифта шудааст. Дар ин бора сухнгӯи фурудгоҳ хабар дод.

Барои аз барф тоза намудани хати парвоз, ҷузутомҳои низомӣ ва техникаи зарурӣ сафарбар шуда буд. Ба хатҳои парвоз хока ё реагентҳои зидди лағшиш пошида шудааст.

Баъд аз бориши барфи зиёд ва вазиши боди сахт муваққатан қабули ҳавопаймоҳо ва парвозҳо аз ин фурудгоҳ манӯъ шуда буд.

Дар пайи ҳамлаҳои беисти Русия ба минтақаҳои ғайринизомии Украина, сафири Амрико бо Киев изҳори ҳамбастагӣ кард.

Изҳороти сафир як рӯз баъди он садо дод, ки Владимир Зеленский, президенти Украина, Вашингтонро барои "вокуниши суст" ба ҳамлаҳои маргбори Маскав танқид намуд.

Бридҷет Бринк рӯзи 6-уми апрел дар шабакаи "X" навишт: "Дар рӯзи мотами миллӣ, дар пайи ҳамлаи мушакии Русия ба Кривой Роҳ, ки боис ба кушта шудани 20 кас, аз ҷумла 9 кӯдак шуд, бо мардуми Украина изҳори ҳамбастагӣ мекунем."

"Мо ҳамдардии худро ба хонаводаҳо ва азизони тамоми қурбониён ва маҷруҳон иброз медорем," – афзуд ӯ.

Сафири Амрико дар Украина гуфт, "аз соати шашуними субҳ Киев ва минтақаҳои дигари Украина ҳамчунон зери ҳамлаҳои мушакии Русия қарор доранд. Садои таркишҳои сахт дар пойтахт ва гузоришҳое аз ҳамла дар чандин шаҳр шунида мешавад."

Дар ҳамин ҳол, Эммануэл Макрон, раисҷумҳури Фаронса, дар вокуниш ба ҳамлаҳои беисти Русия ба минтақаҳои ғайринизомии Украина, хоҳони "чораҳои қотеъ" шуд.

Чойхонаи тоҷикии "Роҳат" дар пойтахти Украина рӯзи 6-уми апрел дар ҳамлаи мушакии Русия қисман вайрон шудааст.

Чанд тоҷики муқими Киев рӯзи 7-уми апрел дар суҳбат бо Радиои Озодӣ гуфтанд, ки чойхона корношоям шуд ва дарҳояшро ба рӯи муштариён бастанд.

Ба гуфтаи онҳо, чанд мушаки Русия ба атрофи чойхона афтода, тирезаҳои онро шикаст ва дохили биноро хароб кард.

Соҳиби чойхона гуфт, дар фурсати зудтарин дубора кори он оғоз хоҳад шуд. Вай нагуфт, ки аз ин ҳамла чӣ қадар зиён дидааст.

Бори аввал нест, ки ин чойхона зиён мебинад. Моҳи феврал дар чунин ҳамлае чойхонаи "Роҳат" сӯхта буд.

Чойхонаи "Роҳат" бо пешниҳоди таомҳои миллӣ дар маркази Киев як макони маъруф барои тоҷикони муқими Украина ва баъзе аз сокинони маҳаллӣ дониста мешавад. Барои то сад муштарӣ ҷой дорад.

Дар аксҳо дар шабакаҳои иҷтимоӣ дида мешавад, ки сафорати Тоҷикистон дар Украина низ аксар чорабиниҳои фарҳангияшро дар ҳамин чойхона мегузаронад.

Видеоро дар инҷо бинед:

Кумитаи дин ва танзими ҷашну маросим ба гузориши Радиои Озодӣ дар бораи иҷозаи таъмир надодан ба як масҷиди сӯхта дар Исфара вокуниш кард. Намояндагони Кумита навиштанд, ки барои бозсозии ибодатгоҳ мухолифат надоранд.

Сокинони деҳаи Хушободи Исфара ҳафтаи гузашта ба Радиои Озодӣ шикоят карданд, ки як моҳ пеш масҷиди деҳаашон ба коми оташ рафт, аммо мақомот иҷозат намедиҳанд онро дубора барқарор кунанд.

Вокуниши Кумитаи дин рӯзи 7-уми апрел дастраси Радиои Озодӣ шуд. Дар он омадаст, ки "мақоми ваколатдори давлатӣ дар соҳаи дин барои бозсозии масҷиди панҷвақтаи деҳаи Хушободи шаҳри Исфара зид нест."

Ин ниҳод гуфтааст, солҳои гузашта чанд масҷид, аз ҷумла дар шаҳрҳои Ваҳдат ва Турсунзода сӯхта буданд ва баъд аз гирифтани хулосаи идораи оташнишонӣ барои бозсозии ҳарду ибодатгоҳ иҷозат дода шуд.

“Бинобар ин, дар ҳолати пешниҳод гардидани хулосаҳои зикршуда ва дархости ҳайати муассисон, Кумита барои бозсозии масҷиди панҷвақта дар деҳаи Хушободи шаҳри Исфара низ зид нест,”-омадааст дар посухи Кумитаи дин.

Ба гуфтаи сокинони Хушобод, масҷиди деҳа дар моҳи феврали имсол оташ гирифт. Мардум сабаби ҳодисаро ба ҳам расидани сими барқ мегӯянд. Сокинон бо ирсоли видео ба Радиои Озодӣ гуфтанд, мардум барои бозсозии масҷид пул ҷамъ кардаанд, аммо мақомот иҷозат намедиҳанд. Дилбар Қурбонова, раиси ҷамоати Хонобод, рӯзи чоруми апрел ба Радиои Озодӣ гуфта буд, “аввал хулосаи идораи сӯхторнишониро гиранд, баъд ин масъаларо дида мебароем.”

Мақомоти шаҳри Исфара намегӯянд, ки хулосаи санҷиши идораи оташнишонӣ кай мерасад. Дар посухи Кумитаи дин омадааст, соли 2023 баъди сӯхтани масҷиди панҷвақтаи деҳаи Зиёраттути шаҳри Турсунзода, хулосаи идораи оташнишонӣ баъди шаш моҳ расида буд.

Тибқи омор, дар Тоҷикистон беш аз чор ҳазор масҷидро ба рӯйхат гирифтаанд. Як масҷид ба сари ду-дуним ҳазор кас. Аксари онҳо масҷидҳои панҷвақта ҳастанд, вале сокинон ҳар чанд вақт аз душвории сабтином ва ё эҳтимоли баста шудани ибодатгоҳҳо шикоят мекунанд.

Ҳукумати Тоҷикистон муҳлати овардани ду ҳавопаймои ширкати “Сомон -Эйр”-ро ба кишвар дароз кард.

Ҳамчунин ин ширкат аз пардохти боҷи гумрукӣ ва молиёт (андоз) аз арзиши иловашуда барои ду ҳавопаймо озод шудааст.

Радиои Озодӣ қарори ҳукуматро рӯзи 7-уми апрел дид.

Дар ҳуҷҷат омадааст, ширкати “Сомон Эйр” ҳақ дорад, ду ҳавопаймои “Боинг 737-800”-ро то 30-юми августи соли 2026 ба кишвар биорад.

Ширкат аз пардохти боҷи гумрукӣ ва андоз аз арзиши иловашуда ҳангоми овардани ҳавопаймоҳо озод аст, вале маблағи умуми он маълум нест.

Дар қарори ҳукумат “воридоти муваққатӣ” навишта шудааст, аммо маълум нест, ки ҳавопаймоҳо барои чанд вақт ба Тоҷикистон оварда мешаванд.

Дафтари матбуоти ширкати “Сомон Эйр” пештар хабар дода буд, ки ҳавопаймоҳои “Boeing 737-800” аз ширкати лизингии DAE Capital-и Имороти Муттаҳидаи Араб харида мешаванд.

“Сомон Эйр” ягона ширкати мустақили ҳавопаймоӣ ва дар айни замон ширкати бидуни рақиби ҷиддӣ дар Тоҷикистон аст.

Гуфта мешавад, “Сомон Эйр” ба яке аз наздикони раисҷумҳур Эмомалӣ Раҳмон тааллуқ дорад ва борҳо барои монополияи бозор танқид шудааст.

Дар пайи таҳдиди раисҷумҳури Амрико Доналд Трамп ба бомбаборони Эрон, артиши ин кишвар ба ҳолати омодабоши ҷангӣ гузаштааст.

Хабаргузории “Рейтерс” бо такя ба мақомоти баландпояи Эрон навишт, дастури омодабоши артиш аз сӯи роҳбари олии ин кишвар Алии Хоманаӣ содир шудааст.

Трамп дар охири моҳи март таҳдид кард, ки агар Вашингтон ва Теҳрон дар бораи барномаи ҳастаии Эрон ба созиш нарасанд, Иёлоти Муттаҳида ба Эрон ҳамла мекунад.

Ба иттилои манобеи “Рейтерс”, Эрон музокироти мустақимро бо Амрико рад карда, гуфтааст, бо Вашингтон аз тариқи миёнарав музокира мекунад.

Теҳрон мехоҳад Умон миёнарави ин гуфтугӯҳо бошад.

Ба гузориши “Рейтерс”, Эрон ба Ироқ, Кувайт, Имороти Муттаҳидаи Арабӣ, Қатар, Туркия ва Баҳрайн нома навишта, ҳушдор додааст, ки ҳаргуна дастгирӣ аз ҳамлаи Амрико ба Эрон ҳамчун “амали душманона” баҳо дода мешавад.

Дар номаи Теҳрон омадааст, ёрӣ ба Амрико дар ҳамла ба Эрон “барои кишварҳо оқибатҳои ҷиддӣ хоҳад овард.”

Доналд Трамп аз замони бозгашт ба Кохи Сафед борҳо гуфтааст, ки музокирот ва даст ёфтан ба созиши ҳастаӣ бо Эронро бар ҳамлаи низомӣ тарҷеҳ медиҳад.

Масъулини пулиси роҳи ин кишвар рӯзи якшанбе, 6 апрел аз сар задани дастикам як миллион садама дар рухсатиҳои наврӯзӣ, хабар доданд.

Дар ин рӯзҳо рафтуомади воситаҳои нақлиёт дар шоҳроҳҳои Эрон бештар мешавад ва шумори садамаҳо ва маргу мир низ афзоиши чашмгир меёбад.

Дар Афғонистон низ дар чаҳор рӯзи Иди Фитр дастикам 30 нафар дар садамаҳои ҷодаӣ ҷон бохтаанд ва 155 нафари дигар захмӣ шудаанд.

Раёсати назорати роҳҳои ҳукумати Толибон эълон кардааст, ки ҳадди ақал 80 садама дар Афғонистон сабт шудааст.

Дафтари матбуоти артиши Покистон рӯзи якшанбе, 6 апрел бо нашри хабарномае гуфт, нерӯҳои амниятии ин кишвар, шоми шанбе пас аз пайгирии як гурӯҳи ёздаҳнафара аз шӯришиёни мусаллаҳ, бо онҳо даргир шуданд, ки дар натиҷа 8 тани онҳоро куштанд ва 3 тани дигарро захмӣ карданд.

Хабарнома мегӯяд, ки Исломобод борҳо аз ҳукумати Толибон дар Афғонистон хостааст, то марзҳои худро ба таври муносибат муҳофизат кунад ва бо амалӣ кардани ӯҳдадориҳои худ нагузорад, ки хоки Афғонистон алайҳи Покистон истифода шавад.

Ҳукумати Толибон дар мавриди ин изҳороти тозаи артиши Покистон чизе нагуфтааст. Аммо Вазорати корҳои хориҷии Толибон пеш аз ин дар посух ба иттиҳомоти ба ин монанди Исломобод гуфта буд, ки аз Покистон мехоҳад, то ба ҷойи изҳороти "ғайримасъулона", ба амният ва ҳалли мушкилоти дохилии худ таваҷҷуҳ кунад.

Ба гузориши хабаргузории Ассошиэйтед Пресс, дар тамоми аёлатҳо беш аз ҳазор намоиши эътирозӣ баргузор шуд. Яке аз тазоҳурот дар наздикии майдони бозии голфи Трамп дар аёлати Флорида гузашт. Ба гузориши “Ройтерс”, наздики 400 нафар дар назди манзили президент дар ин аёлат ҷамъ шуданд.

Созмондиҳандагони тазоҳурот, ки асосан тарафдорони демократҳо мебошанд, гуфтанд, муқобили ғасби қудрат ҳастанд. Муътаризон аз барканории кормандони давлатӣ, бастани ниҳодҳо, коҳиши маблағгузории бахши тандурустӣ ва андозҳои нав норозигӣ карданд.

Дар пайи чунин норозигиҳо, Трамп тариқи шабакаи иҷтимоиаш Truth Social, аз мушкилиҳои вазнин дар шароити ҷанги тиҷоратӣ ҳушдор дод.

Ба гузориши “Ройтерс”, ҳафтаи равон маҳбубияти Доналд Трамп то 43 дарсад паст шудааст. Ин пастарин нишондод аз замони бозгашти Трамп ба Кохи Сафед аст.

Виталий Кличко, шаҳрдори Киев гуфт, дар ноҳияи Дарнитскийи Киев ҷасади як нафар пайдо шудааст. Ҷанозаро дар кӯча ва дар наздикии макони афтидани мушак пайдо кардаанд.

Дар се ноҳияи Киев сӯхтор сар зада, чанд мошин зарар дидааст. Шаҳрдори Киев гуфт, бинои як маркази тиҷоратӣ ҳам осеб дид.

Бридҷит Бринк, сафири ИМА дар Киев, дар шабакаи X (Твиттер) навишт, "то соати 6:30-и субҳ, шаҳри Киев ва қисматҳои боқимондаи Украина зери ҳамлаи мушакҳои баллистикии Русия қарор доранд. Дар пойтахт садои таркиши сахт ба гӯш мерасад ва аз дигар шаҳрҳо низ дар бораи ҳамлаи паҳподҳо гузориш мерасад."

Пештар Владимир Зеленский, раиси ҷумҳури Украина аз сафири ИМА дар Киев интиқод кард, ки дар баробари ҳамлаи Русия ба шаҳри саноатии Кривой Рог вокуниши ҷиддӣ накард. Рӯзи 4-уми апрел дар ин ҳамла,дастикам 18 нафар кушта шуданд, ки нисфи онҳо кудакон ҳастанд.

Сафири Амрико дар Украина навишт, аз ин ҳодиса ба ваҳшат афтидааст ва маҳз барои пешгирӣ аз ин гуна фоҷиаҳо, “ҷанг бояд қатъ шавад.” Бринк ба Русия ягон ишора накардааст.

Ҷузъиёти қарори додгоҳ маълум нест ва барои ҳамин рӯшан нест, ки хабарнигорро бар асоси кадом далелҳо ҷазо додаанд.

Додситонии кулли Русия моҳи январи соли 2023, нашрияи "Медуза"-ро ба рӯйхати "созмонҳои номатлуб" ворид кард. Ҳамкорӣ бо ташкилотҳое, ки ба ин рӯйхат шомил шудаанд, метавонад сабабгори ҷавобгарии ҷиноӣ шавад.

Ба ҳисоби нашрияи "Медуза", танҳо дар соли гузашта додгоҳҳои Русия 81 касро барои ҳамкорӣ бо "созмони номатлуб" ҷарима кардаанд.

Раҳбарони Тоҷикистон, Узбекистон ва Қирғизистон рӯзи 31-уми март созишномаро дар бораи нуқтаи пайванди марзҳои се кишвар имзо карданд. Маросим дар шаҳри Хуҷанди вилояти Суғд баргузор шуд.

Ҳар се кишвари Осиёи Марказӣ дар гузашта бар сари таъйини марз ва убуру мурур аз қаламравҳои якдигар мушкил доштанд. Ин номуайянӣ дар чор соли пеш дар сарҳади Тоҷикистон ва Қирғизистон сабаби задухӯрдҳои мусаллаҳона гашт ва аз ду тараф даҳҳо кушта ва захмӣ барҷой гузошт.

Бар асоси ин санад, Оҷонсии захираҳои моддии давлатӣ бе пардохтани боҷи давлатӣ ва танҳо бо супоридани ними андоз аз арзиши иловашуда (НДС) ин маҳсулотҳоро ба кишвар ворид мекунад:

• 100 ҳазор тонна гандум
• 2 ҳазор тонна орд
• 30 ҳазор тонна шакар
• Ҳазор тонна равғани растанӣ
• Ҳазор тонна биринҷ
• 2 ҳазор тонна гушт
• Ҳазор тонна гӯшти қимаи мурғ
• 100 ҳазор тонна сӯзишвории дизелӣ
• 100 ҳазор тонна бензин

Мақомот мегӯянд, ҳадаф аз додани имтиёз ба Оҷонсии захираҳои моддии давлатӣ, муътадил нигоҳ доштани арзиши маҳсулоти ғизоӣ ва сӯзишворӣ аст. Аммо соҳибкорон ва коршиносони иқтисодӣ, додани имтиёз ба як идораи давлатиро, ки иштирокчии бозор аст, хилофи рақобат медонанд.

Ба қавли манбаъ, дар сурати анҷоми ин сафар, Нетаняҳу аввалин роҳбари хориҷӣ мешавад, ки шахсан бо Доналд Трамп вохӯрда, барои бекор кардани таърифаҳо талош мекунад.

Ҳафтаи гузашта Иёлоти Муттаҳида барои воридоти мол аз аксар кишварҳои ҷаҳон таърифа (тариф, тарофа) ҷорӣ кард. Ин таърифаҳо барои молҳое, ки аз Исроил вориди Амрико мешаванд 17 дарсад муқаррар шудааст. Пештар Тел-Авив ваъда дода буд, ки ҳамаи таърифаҳоро барои молҳо ИМА бекор мекунад.

Дар назар аст, ки Трамп ва Нетаняҳу ҳамчунин музокироти ба бунбаст расидаи оташбас дар Ғазза ва мавзӯи Эронро баррасӣ кунанд.

Ин мақоми покистонӣ рӯзи 4 апрел дар нишасти хабарӣ гуфт, "паноҳҷӯёни афғонро аз ин аёлат ҳеҷ касе бо зӯр ихроҷ намекунад. Ин як паёми рӯшан аст. Паёми рӯшани ман ба пулис ва низомиёни аёлат ин аст, ки ҳеҷ касеро ихроҷ накунед. Зеро бо вазъияте, ки дар онҷо вуҷуд дорад, ҳукумати Толибонро онҳоро қабул надорад. Барои онҳо шароити будубош фароҳам нест. Барои хӯрдан ва нӯшидан чизе надоранд. Ихроҷи онҳо сиёсати мо ва дар дастури кори мо нест ва намегузорем чунин шавад".

Ҳукумати Покистон дар моҳи январи соли ҷорӣ эълон кард, ки дорандагони корти шаҳрвандии Афғонистон бояд то 31 март ин кишварро довталабона тарк кунанд ва дар ғайри он, бо зӯр ихроҷ хоҳанд шуд.

Ҳукумати Покистон аз аввали моҳи апрел раванди боздошти ихроҷи муҳоҷирони афғонро дар бахшҳои гуногуни Покистон сахттар кард ва даҳҳо тан аз ин муҳоҷиронро, ки дар Исломобод ва Равилпиндӣ боздошт шуда буданд, аз тариқи гузаргоҳи "Турхам" ба Афғонистон ихроҷ кард.

Бархе аз масъулини умури муҳоҷират дар "Турхам" ба хабарнигорони покистонӣ гуфтаанд, ки ин муҳоҷирон шомили дорандагони корти муҳоҷират бо номи "АСС" ва муҳоҷирони беҳуҷҷат будаанд.

Ба тахмини Комиссариати олии СММ дар умури паноҳандагон (UNHCR), якуним миллион муҳоҷири афғон дар Покистон зиндагӣ мекунанд, ки аз ин шумор ҳудуди 800 ҳазор дорандагони корти "ACC" мебошанд.

Ба гузориши ин расонаҳо, ҳудуди 4500 нафар захмӣ ва 220 тани дигар ҳанӯз нопадид ҳастанд.

Созмони Милали Муттаҳид аз кишварҳои ҷаҳон хост, ки ба Мянмар кӯмак кунанд. Ба тахмини СММ, мумкин аст беш аз се миллион нафар аз ин зилзима осеб дида бошанд.

Зилзилаи 7,7-дараҷаӣ рӯзи ҷумъаи 27-уми март Мянмарро такон дод.

Шумори зиёде аз мардуми ин кишвар ҳанӯз бе сарпаноҳ ҳастанд ва ё ҳам аз тарси эҳтимоли фурӯ рехтани биноҳо, дар берун аз хонаҳои худ ба сар мебаранд.

Дмитрий Песков рӯзи 4 апрел ба хабарнигорон гуфт, "мо ба ин бовар ҳастем, ки мушкили парвандаи ҳастаии Эрон танҳо бояд бо абзорҳои сиёсӣ ва дипломатӣ расидагӣ ва ҳаллу фасл шавад".

Ӯ афзуд, "албатта мо бовар дорем, ки ҳама тарафҳо бояд дар ин замина хештандории комил дошта бошанд ва ҳангоми баҳс дар мавриди масъалаҳо, ба таври хос бар талошҳои дипломатӣ таваҷҷуҳ кунанд".

Дмитрий Песков ҳамчунин бо ишора ба инки Русия дар талош барои барқарории робитаҳои худ бо Амрико аст, таъкид кард, "аммо Эрон низ шарик ва муттаҳиди мо аст, ки робитаҳои бисёр густурда ва чандҷониба бо он дорем".

Доналд Трамп, раисҷумҳури Амрико таҳдид кардааст, ки агар Эрон барои дастёфтан ба созиши наве дар мавриди барномаи ҳастаиаш бо Амрико музокира накунад, таҳримҳои дигар алайҳи он ҷорӣ мекунад ва Эрон "бамборон" хоҳад шуд.

Маскав пешниҳод кардааст, ки байни Амрико ва Эрон миёнҷигарӣ кунад.

Раҳбарони Эрон ва Амрико дар як моҳи гузашта ба якдигар номаҳо фиристоданд ва мақомҳои Ҷумҳурии исломӣ мегӯянд, ки омодаи музокироти ғайримустақим бо ИМА ҳастанд.

Бо вуҷуди он, ки Доналд Трамп мегӯяд, хоҳони гуфтугӯи мустақим бо Эрон аст, вале айни замон тибқи гузоришҳо, Вашинтгон "ба таври ҷиддӣ анҷоми музокироти ғайримустақим бо Эрон баррасӣ мекунад".

Ба иттилои ин ниҳод, бинобар ҳавои номусоид, аз ҷумла, боридани боронҳои сахт дар бархе ноҳияҳои куҳистонии вилояти Суғд, атрофи Душанбе ва ғарби ВМКБ, хатари омадани селҳо вуҷуд дорад.

Кумитаи ҳолатҳои фавқулода бо такия ба Оҷонсии ҳавошиносии Тоҷикистон мегӯяд, ки хатари хатари лағзиши тарма дар шоҳроҳи Душанбе-Хуҷанд, ҳанӯз боқист.

Аз ин рӯ, КҲФ ба сокинон ва меҳмонони кишвар тавсия додааст, ки дар ин рузҳо аз рафтан ба соҳили дарёву рӯдхона, ҳамчунин сайёҳат ба куҳу пуштаҳо, ибо варзанд. Аз ронандагон ҳам хоҳиш шудааст, ки безарурат ба сафар набароянд.

Ва низ аз сокинон хоҳиш шудааст, ки дар ин рӯзҳо аз рафтан ба доманакӯҳҳои барои ҷамъоварии гиёҳ, шикор, чӯпонӣ ва моҳидорӣ, худдорӣ кунанд.

Ҳамасола чандин нафар дар Тоҷикистон бар асари ҳодисаҳои табиӣ ба ҳалокат мерасанд

Кумитаи ҳолатҳои фавқулодаи Тоҷикистон чанд рӯз пеш аз марги як сокини ноҳияи Дарвоз хабар дод, ки аз кӯҳ афтода ва ҷон бохтааст.

Ба иттилои ин ниҳод, марди 34-сола, сокини деҳаи Паткунови ҷамоати деҳоти Қалъаи Хумб, субҳи 2-юми апрел бо мақсади ҷамъоварии чукрӣ ба кӯҳҳои наздики деҳа рафта буд.

Ҷасади ин мард баъд аз зуҳри ҳамон рӯз аз ҷониби сокинони маҳаллӣ ёфт шуда, ба наздиконаш супурда шуд.

Русия бо даҳҳо ҳавопаймои бесарнишин ба шаҳри Харков, дар шимолу шарқи Украина, зарба задааст.

Мақомоти Украина гуфтанд, ки дар ҳамлаҳои шаби 3 ба 4-уми апрел панҷ кас кушта ва зиёда аз 30 тани дигар маҷрӯҳ шуданд.

Чанд бинои истиқоматӣ низ сӯхтаву вайрон гардидааст.

Додситонии кулли Украина гуфт, дар миёни кушташудагон се кӯдак ҳаст.

Ҳавопаймоҳои бесарнишини Русия дар шаҳри Днепри Украина низ се нафар ва дар вилояти Запорожйе як касро захмӣ кардаанд.

Дар ҳамин ҳол, шаҳрдори Маскав Сергей Собянин рӯзи 4-уми апрел гуфт, як ҳавопаймои бесарнишинро аз байн бурданд, ки ба самти пойтахти Русия меомад.

Хабаргузориҳои Русия аз қавли як намояндаи Оҷонси федеролии ҳамлу нақл хабар доданд, ки се фурудгоҳ муваққатан баста шудааст.

Дертар хабар расид, ки фурудгоҳи "Внуково" барои қабулу гусели ҳавопаймоҳо боз аст, аммо дар бораи аз сар гирифтани фаъолияти дуи дигар хабаре нест.

Доналд Трамп рӯзи сеюми апрел эълон кард, аз тамоми шарикони тиҷоратиаш боҷ меситонад ва Чин аз ҷумлаи кишварҳое ҳаст, ки барои фурӯхтани молу маҳсулоатш дар Амрико бояд боҷи бештар супорад.

Чин дар посух барои маҳсулотӣ воридотӣ аз Амрико боҷи 34 садӣ таъин кард.

Хабаргузории Reuters навиштааст, ки Пекин 16 ширкати Амрикоиро ба феҳрасти содироти назоратшаванда ворид карда, номгӯйи маҳсулоти содиротиро маҳдуд кард.

Бино ба дастури Трамп, ки барои 183 кишвар таърофа ё боҷи гумрукӣ эълон кард, Чин бояд барои воридоти маҳсулоташ ба Амрико 34 дар сад боҷ бипардозад. Чин ин тасмими президенти амрикоро мухолиф ба қонунҳои тиҷорати байналмилалӣ ва ҳуқуқу манфиатҳои шарикони тиҷоратӣ хонд. Ин кишвар рӯзи 3-юми апрел ваъда дод, ки дар нисбати Амрико ҳам аз “чораҳои шадиди ҷавобӣ” кор хоҳад гирифт.

Раиси Кумисюни Аврупо Урсула фон дер Лейен ҳам тасмими президенти Амрикоро барои ҷорӣ кардани боҷ зарбаи сахте ба иқтисоди ҷаҳонӣ хонда, таҳдид кард, ки “иқдоми ҷавобӣ” хоҳад дод.

Сокинони як деҳа дар Исфара шикоят доранд, ки мақомот барои таъмири масҷид дар маҳалли зисташон иҷозат намедиҳанд.

Масҷиди деҳаи Хушобод дар моҳи феврали имсол оташ гирифт. Мардум сабаби ҳодисаро ба ҳам расидани сими барқ мегӯянд. Хулосаи оташнишонҳо ҳанӯз эълон нашудааст.

Ба гуфтаи муаллифи наворе, ки ба Радиои Озодӣ фиристод, мардум барои бозсозии масҷид пул ҷамъ кардаанд, аммо мақомот иҷозат намедиҳанд.

Дилбар Қурбонова, раиси ҷамоати Хонобод, рӯзи чоруми апрел гуфт, “аввал хулосаи идораи сӯхторнишониро гиранд, баъд ин масъаларо дида мебароем. Мақомот онро ба Кумитаи дин мефиристанд. Баъди он ки Кумита иҷозат дод, таъмир оғоз мешавад. То ҷамъ шудани хулосаи инҳо вақт меравад."

Мақомоти шаҳри Исфара намегӯянд, ки хулосаи санҷиши идораи оташнишонӣ кай мерасад.

Сокинони деҳа шикоят доранд, ки бо сабаби набудани ибодатгоҳ маҷбуранд, барои адои намоз ба деҳаҳои ҳамсоя раванд.

Баъзе аз онҳо далели мақомотро барои ба таъхир гузоштани таъмири масҷид "ҳадафмандона" медонанд.

Кишварҳои ғарбӣ ва созмонҳои ҳомии ҳуқуқ, мақомоти Тоҷикистонро барои маҳдуд кардани озодиҳои динӣ танқид мекунанд.

Аз ҷумла Кумисюни байнулмилалии Амрико дар мавриди озодиҳои динӣ моҳи март гуфт, ки соли 2024 вазъи озодиҳои динӣ дар Тоҷикистон "ниҳоят бад" шуд. Мақомоти тоҷик дар гузашта ин гуна танқидҳоро рад кардаанд.

Тибқи омор, дар Тоҷикистон беш аз чор ҳазор масҷидро ба рӯйхат гирифтаанд. Як масҷид ба сари ду-дуним ҳазор кас.

Аксари онҳо масҷидҳои панҷвақта ҳастанд, вале сокинон ҳар чанд вақт аз душвории сабтином ва ё эҳтимоли баста шудани ибодатгоҳҳо шикоят мекунанд.

Эрнис Бердиев, мусофиркаши қирғиз мегӯяд, ҳодиса баъд аз зӯҳри 29 март дар Маскав рух дод.

Ба гуфтаи Эрнис, вақте ӯ аз мусофирон хостааст, ки пули роҳро пешпардохт кунанд, дар ҷавоб вайро таҳқир карда, сипас латукӯб мекунанд.

Дар расонаҳо навори ҳодиса аз дурбини таксӣ ҳам нашр шудааст, ки дар он латукуби Эрнис дида мешавад. Эрнис мегӯяд, ки дар мошин ду мард ва ду духтар буданд.

"Яке аз онҳо маро дашном дод, ман хомӯш наистодам, баъди даст бардоштани яке аз онҳо, худамро ҳимоя кардам",-гуфтааст ӯ.

Латукӯби ронандагони муҳоҷир ҳодисаи нав нест. Онҳо дар Русия аксаран мавриди ҳамла ва ё латукӯб қарор мегиранд.

Маркази назорати экстремизм бо номи "Сова" дар таҳқиқе гуфтааст, ки аз соли 2023 ба ин тараф бархурди нажодапарастона бо муҳоҷирон дар Русия афзоиш ёфтааст.

Ба иттилои ин ниҳод, марди 34-сола, сокини деҳаи Паткунови ҷамоати деҳоти Қалъаи Хумб, субҳи 2-юми апрел бо мақсади ҷамъоварии чукрӣ ба кӯҳҳои наздики деҳа рафта буд.

"Вале бинобар лағжанда будани замин пас аз боришоти зиёд, ӯ аз баландии 60 метр ба замин афтода ва дар ҷояш ҷон додааст",-омадааст дар хабар.

Ҷасади ин мард баъд аз зуҳри ҳамон рӯз аз ҷониби сокинони маҳаллӣ ёфт шуда, ба наздиконаш супурда шудааст.

Кумитаи ҳолатҳои фавқулода аз сокинон хостааст, ки дар шароити обу ҳавои номусоид аз сафар ба кӯҳҳо худдорӣ намоянд.

Мақомоти Маҷористон ё Венгрия гуфтанд, ки ин кишвари аврупоӣ аз Додгоҳи Байнулмилалии Ҷиноӣ берун хоҳад шуд.

“Давлат раванди хуруҷро рӯзи 3-юми апрел мутобиқ бо Қонуни асосӣ ва байнулмилалӣ оғоз хоҳад кард,” – гуфт як намояндаи ҳукумати Маҷористон.

Ин тасмим дар замоне эълон гашт, ки Бенямин Нетаняҳу, сарвазири Исроил, дар Будапешт қарор дорад.

Пештар Додгоҳи Байнулмилалии Ҷиноӣ ҳукми боздошти Нетаняҳуро содир карда буд.

Ӯро ба ҷинояти ҷангӣ дар Ғазза гумонзад медонанд. Ҷое, ки аз моҳи октябри соли 2023 даргирии нерӯҳои Исроил бо ҷангҷӯёни “Ҳамос” идома дорад. Амрико ва Иттиҳоди Аврупо “Ҳамос”-ро созмони террористӣ медонанд.

Мақомоти Исроил қарори Додгоҳи Байнулмилалии Ҷиноиро беасос хонаанд.

Эмомалӣ Раҳмон, раисҷумҳури Тоҷикистон, рӯзи 3-юми апрел ба Узбекистон рафт.

Ӯ рӯзҳои 3 ва 4-уми апрел дар нишасти сарони давлатҳои Осиёи Марказӣ ва Иттиҳоди Аврупо дар Самарқанд иштирок мекунад.

Ин нишасти нахустини тарафҳост.

“Нишасти Самарқанд нишон хоҳад дод, ки Иттиҳоди Аврупо то чӣ ҳад ба ҳамкории мунтазам ва дарозмуддат бо Осиёи Марказӣ омода аст. Душвории асосӣ барои Брюссел рақобат бо манфиатҳои Чин ва Русия дар минтақа хоҳад буд”, -- мегӯяд Мирҳат Шарифҷон, таҳлилгари Радиои Аврупои Озод/Радиои Озодӣ.

Иттиҳоди Аврупо солҳо боз бо кишварҳои Осиёи Марказӣ, аз ҷумла Тоҷикистон, ки бештар зери нуфузи Русия ҳастанд, равобит дорад. Иқтисоду дигаргунии иқлим, таъмини об ва риояи ҳуқуқи одамон аз мавзуъҳои асосии ҳамкории ду тараф будааст.

Вале бино бар санаде, ки Радиои Озодӣ рӯзи дувуми апрел дид, ҷонибҳо дар нишасти Самарқанд ба истиснои ташаббуси Global Gateway, ки ҳамчун алтернативаи тарҳи "Як камарбанд - як роҳ"-и Чин номбар мешавад, масъалаи Афғонистону мубориза бо таҳдидҳо, давр задани таҳримҳо, волоияти қонуну озодиҳои бунёдӣ ва ҷомеаи шаҳрвандиро низ баррасӣ ва ё ҳадди ақал дар бораи онҳо ишора хоҳанд кард.

Созмони байнулмилалии Human Rights Watch як ҳафта пеш аз намояндагони Иттиҳоди Аврупо талаб карда буд, ки дар гуфтугӯ бо мақомоти Осиёи Марказӣ ба риояи ҳуқуқи инсон таваҷҷуҳ кунанд.

Чун, ба гуфтаи Искра Кирова, мудири созмон дар умури кишварҳои Аврупо ва Осиёи Марказӣ, "ҳабси мунтақидону фаъолон ва маҳдудияти кори ҷомеаи маданӣ ва матбуоти мустақил дар минтақа ба гумон аст, ки ба пешрафте, ки Иттиҳоди Аврупо дар фикри он аст, мусоидат намояд."

Аммо Шавкат Мирзиёев, раисҷумҳури Узбекистон, дар остонаи нишаст ва дар мусоҳиба бо шабакаи Euronews бештар ба масъалаҳои иқтисодӣ ва сармоягузориву рушди устувор бо Иттиҳоди Аврупо таъкид кардааст. Ба иттилои ӯ, дар ҳафт соли охир додугирифт байни кишварҳои Осиёи Марказӣ ва Аврупо афзуда, ба 54 миллиард евро расидааст.

Панҷ кишвари Осиёи Марказӣ солҳои охир барои саркӯби мунтақидон, боздошту ҳабси рӯзноманигорон ва поймоли ҳуқуқи бунёдии сокинон танқид мешаванд. Ҳукуматдории тӯлонӣ ва интихоботҳои бидуни рақобат ва ё олуда ба тақаллуб аз камбудҳои дигари онҳо шумурда мешавад.

Кирилл Дмитриев, намояндаи вижаи Русия дар умури сармоягузории хориҷӣ ва ҳамкориҳои иқтисодӣ, рӯзи 2-юми апрел барои суҳбат дар бораи хатми ҷанг дар Украина ва истиқрори оташбас ба Вашингтон рафтааст.

Хабаргузории "Рейтерс" бо такя ба ду манбаъ рӯзи 3-юми апрел хабар дод, ки Дмитриев бо даъвати расмӣ вориди Вашингтон шуд.

Кохи Сафед иттилоъро тасдиқ накардааст.

Ба гузориши "Рейтерс", Стив Виткофф, намояндаи вижаи Амрико дар умури Ховари Миёна, бо дастури Кохи Сафед ва Департаменти давлатӣ ҳафтаи гузашта Дмитриевро даъват карда, барои дарёфти раводиди кӯтоҳмуддат ба ӯ ёрӣ додааст.

Аз оғози ҳамлаи Русия ба Украина дар соли 2022 бори аввал аст, ки як мансабдори баландпояи Русия аз Вашингтон боздид мекунад.

Доналд Трамп, раисҷумҳури Амрико, чанде пеш аз ҷараёни кунди музокироти оташбас барои хатми ҷанг дар Украина ва рафтори Владимир Путин, президенти Русия, изҳори норизоятӣ кард.

Вай рӯзи 2-юми апрел ҳангоми эълони боҷи изофӣ барои бисёре аз кишварҳо, аз ҷумла Иттиҳоди Аврупо, бори дигар ба пойбандии худ барои поён додани ҷанг дар Украина таъкид намуд.