Дар чанд ҷумла
"14000 ноболиғ дар Душанбе ба беҳудагардӣ машғуланд"
Эмомалӣ Раҳмон, раиси ҷумҳури Тоҷикистон, аз афзоиши ҷинояткорӣ миёни ҷавонону наврасон дар Душанбе нигаронӣ кард ва гуфт, дар панҷ соли охир 14 ҳазор ноболиғ беҳудагардӣ кардаанд. Вай рӯзи 15 феврал дар мулоқот бо роҳбарону фаъолони пойтахт ин равандро "ташвишовар" хонд ва гуфт, талошҳои мақомоти интизомӣ барои пешгирӣ аз он муассир набудааст.
Раиси ҷумҳури Тоҷикистон ба унвони далел ба ҳодисаи занозанӣ миёни хонандагони мактабҳо ва наврасону ҷавонон дар авоили соли ҷорӣ ишора карда ва гуфт, чунин муноқишаҳо "дар бисёр маврид бо задухӯрдҳои гурӯҳӣ, дағалона вайрон кардани тартиботи ҷамъиятӣ ва ҳатто ҳалокати одамон анҷом меёбанд."
Дар моҷарои хунини гурӯҳе аз ҷавонони маҳаллаҳои 102 ва 103-юми пойтахт, ки шаби 2 ба 3 январи соли ҷорӣ сурат гирифт, ду нафар ба ҳалокат расиданд. Мақомот гуфтанд, ки ин ҷавонон муштариёни марказҳои интернетӣ будаанд. Эмомалӣ Раҳмон ҳамзамон ба падидаи "саркардаҳо" дар мактабҳои шаҳр ишора кард, ки ба ҷои таҳсил, ба авбошӣ, зӯроварӣ ва шиканҷа додани хонандагони мактабҳои дигар машғул мебошанд. Оқои Раҳмон аз вазорати маориф ва илм, раёсатҳои маорифи шаҳру ноҳияҳо ва ҳамчунин дигар мақомоти вобаста интиқод кард, ки назорати мактабҳоро ба боди фаромӯшӣ супурдаанд.
Эмомалӣ Раҳмон ҳамчунин машғул шудани ҷавонон дар марказҳои интернетиро "боиси ташвиш" хонд ва афзуд, ки наврасон ба ҷойи гирифтани маълумоти дуруст ва лозимӣ, дар ин марказҳо бештар ба тамошои филмҳои дорои мазмуни зӯроварӣ вақти худро сипарӣ мекунанд.
Дар пойтахти Тоҷикистон ҳудуди 1 миллион аҳолӣ ба сар мебарад ва дар ин шаҳр бар асоси омори расмӣ, наздик ба 2 ҳазор Маркази бозиҳои компютерӣ, бозиҳои букмекерӣ ва Интернет-кафеҳо сабти ном шудаанд, ки муштариёни аксари онҳо ҷавонони аз синни 30 поин ҳастанд.
Ҳамаи хабарҳои имрӯзро дар инҷо бихонед
Песков: Парвандаи ҳастаии Эрон бояд аз роҳи дипломатӣ ҳал шавад
Cухангӯи раёсати ҷумҳури Русия мегӯяд, парвандаи ҳастаии Эрон бояд аз роҳҳои сиёсӣ ва дипломатӣ ҳал шавад ва аз ҳама тарафҳо хостааст, то хештандорӣ кунанд.
Дмитрий Песков рӯзи 4 апрел ба хабарнигорон гуфт, "мо ба ин бовар ҳастем, ки мушкили парвандаи ҳастаии Эрон танҳо бояд бо абзорҳои сиёсӣ ва дипломатӣ расидагӣ ва ҳаллу фасл шавад".
Ӯ афзуд, "албатта мо бовар дорем, ки ҳама тарафҳо бояд дар ин замина хештандории комил дошта бошанд ва ҳангоми баҳс дар мавриди масъалаҳо, ба таври хос бар талошҳои дипломатӣ таваҷҷуҳ кунанд".
Дмитрий Песков ҳамчунин бо ишора ба инки Русия дар талош барои барқарории робитаҳои худ бо Амрико аст, таъкид кард, "аммо Эрон низ шарик ва муттаҳиди мо аст, ки робитаҳои бисёр густурда ва чандҷониба бо он дорем".
Доналд Трамп, раисҷумҳури Амрико таҳдид кардааст, ки агар Эрон барои дастёфтан ба созиши наве дар мавриди барномаи ҳастаиаш бо Амрико музокира накунад, таҳримҳои дигар алайҳи он ҷорӣ мекунад ва Эрон "бамборон" хоҳад шуд.
Маскав пешниҳод кардааст, ки байни Амрико ва Эрон миёнҷигарӣ кунад.
Раҳбарони Эрон ва Амрико дар як моҳи гузашта ба якдигар номаҳо фиристоданд ва мақомҳои Ҷумҳурии исломӣ мегӯянд, ки омодаи музокироти ғайримустақим бо ИМА ҳастанд.
Бо вуҷуди он, ки Доналд Трамп мегӯяд, хоҳони гуфтугӯи мустақим бо Эрон аст, вале айни замон тибқи гузоришҳо, Вашинтгон "ба таври ҷиддӣ анҷоми музокироти ғайримустақим бо Эрон баррасӣ мекунад".
Ҳушдори КҲФ аз селхезӣ ва тармафароӣ дар рӯзҳои оянда
Кумитаи ҳолатҳои фавқулодаи Тоҷикистон аз омадани селҳои эҳтимолӣ дар рузҳои оянда ҳушдор дод. Аз сокинон хоста шудааст, ки дар ин рӯзҳо аз эҳтиёт кор бигиранд.
Ба иттилои ин ниҳод, бинобар ҳавои номусоид, аз ҷумла, боридани боронҳои сахт дар бархе ноҳияҳои куҳистонии вилояти Суғд, атрофи Душанбе ва ғарби ВМКБ, хатари омадани селҳо вуҷуд дорад.
Кумитаи ҳолатҳои фавқулода бо такия ба Оҷонсии ҳавошиносии Тоҷикистон мегӯяд, ки хатари хатари лағзиши тарма дар шоҳроҳи Душанбе-Хуҷанд, ҳанӯз боқист.
Аз ин рӯ, КҲФ ба сокинон ва меҳмонони кишвар тавсия додааст, ки дар ин рузҳо аз рафтан ба соҳили дарёву рӯдхона, ҳамчунин сайёҳат ба куҳу пуштаҳо, ибо варзанд. Аз ронандагон ҳам хоҳиш шудааст, ки безарурат ба сафар набароянд.
Ва низ аз сокинон хоҳиш шудааст, ки дар ин рӯзҳо аз рафтан ба доманакӯҳҳои барои ҷамъоварии гиёҳ, шикор, чӯпонӣ ва моҳидорӣ, худдорӣ кунанд.
Ҳамасола чандин нафар дар Тоҷикистон бар асари ҳодисаҳои табиӣ ба ҳалокат мерасанд
Кумитаи ҳолатҳои фавқулодаи Тоҷикистон чанд рӯз пеш аз марги як сокини ноҳияи Дарвоз хабар дод, ки аз кӯҳ афтода ва ҷон бохтааст.
Ба иттилои ин ниҳод, марди 34-сола, сокини деҳаи Паткунови ҷамоати деҳоти Қалъаи Хумб, субҳи 2-юми апрел бо мақсади ҷамъоварии чукрӣ ба кӯҳҳои наздики деҳа рафта буд.
Ҷасади ин мард баъд аз зуҳри ҳамон рӯз аз ҷониби сокинони маҳаллӣ ёфт шуда, ба наздиконаш супурда шуд.
5 кушта ва беш аз 30 захмӣ. Ҳамлаи густурдаи Русия ба Харков
Русия бо даҳҳо ҳавопаймои бесарнишин ба шаҳри Харков, дар шимолу шарқи Украина, зарба задааст.
Мақомоти Украина гуфтанд, ки дар ҳамлаҳои шаби 3 ба 4-уми апрел панҷ кас кушта ва зиёда аз 30 тани дигар маҷрӯҳ шуданд.
Чанд бинои истиқоматӣ низ сӯхтаву вайрон гардидааст.
Додситонии кулли Украина гуфт, дар миёни кушташудагон се кӯдак ҳаст.
Ҳавопаймоҳои бесарнишини Русия дар шаҳри Днепри Украина низ се нафар ва дар вилояти Запорожйе як касро захмӣ кардаанд.
Дар ҳамин ҳол, шаҳрдори Маскав Сергей Собянин рӯзи 4-уми апрел гуфт, як ҳавопаймои бесарнишинро аз байн бурданд, ки ба самти пойтахти Русия меомад.
Хабаргузориҳои Русия аз қавли як намояндаи Оҷонси федеролии ҳамлу нақл хабар доданд, ки се фурудгоҳ муваққатан баста шудааст.
Дертар хабар расид, ки фурудгоҳи "Внуково" барои қабулу гусели ҳавопаймоҳо боз аст, аммо дар бораи аз сар гирифтани фаъолияти дуи дигар хабаре нест.
Чин ҳам ба молу маҳсулоти ИМА боҷ ҷорӣ кард
Вазорати молияи Чин хабар дод, ки ба тамоми маҳсулоти воридотӣ аз Амрико тарофаҳои иловагӣ ҷорӣ мекунад.
Доналд Трамп рӯзи сеюми апрел эълон кард, аз тамоми шарикони тиҷоратиаш боҷ меситонад ва Чин аз ҷумлаи кишварҳое ҳаст, ки барои фурӯхтани молу маҳсулоатш дар Амрико бояд боҷи бештар супорад.
Чин дар посух барои маҳсулотӣ воридотӣ аз Амрико боҷи 34 садӣ таъин кард.
Хабаргузории Reuters навиштааст, ки Пекин 16 ширкати Амрикоиро ба феҳрасти содироти назоратшаванда ворид карда, номгӯйи маҳсулоти содиротиро маҳдуд кард.
Бино ба дастури Трамп, ки барои 183 кишвар таърофа ё боҷи гумрукӣ эълон кард, Чин бояд барои воридоти маҳсулоташ ба Амрико 34 дар сад боҷ бипардозад. Чин ин тасмими президенти амрикоро мухолиф ба қонунҳои тиҷорати байналмилалӣ ва ҳуқуқу манфиатҳои шарикони тиҷоратӣ хонд. Ин кишвар рӯзи 3-юми апрел ваъда дод, ки дар нисбати Амрико ҳам аз “чораҳои шадиди ҷавобӣ” кор хоҳад гирифт.
Раиси Кумисюни Аврупо Урсула фон дер Лейен ҳам тасмими президенти Амрикоро барои ҷорӣ кардани боҷ зарбаи сахте ба иқтисоди ҷаҳонӣ хонда, таҳдид кард, ки “иқдоми ҷавобӣ” хоҳад дод.
"Пул ҳаст, иҷоза нест." Манъи бозсозии як масҷиди Исфара аз баҳри чист?
Сокинони як деҳа дар Исфара шикоят доранд, ки мақомот барои таъмири масҷид дар маҳалли зисташон иҷозат намедиҳанд.
Масҷиди деҳаи Хушобод дар моҳи феврали имсол оташ гирифт. Мардум сабаби ҳодисаро ба ҳам расидани сими барқ мегӯянд. Хулосаи оташнишонҳо ҳанӯз эълон нашудааст.
Ба гуфтаи муаллифи наворе, ки ба Радиои Озодӣ фиристод, мардум барои бозсозии масҷид пул ҷамъ кардаанд, аммо мақомот иҷозат намедиҳанд.
Дилбар Қурбонова, раиси ҷамоати Хонобод, рӯзи чоруми апрел гуфт, “аввал хулосаи идораи сӯхторнишониро гиранд, баъд ин масъаларо дида мебароем. Мақомот онро ба Кумитаи дин мефиристанд. Баъди он ки Кумита иҷозат дод, таъмир оғоз мешавад. То ҷамъ шудани хулосаи инҳо вақт меравад."
Мақомоти шаҳри Исфара намегӯянд, ки хулосаи санҷиши идораи оташнишонӣ кай мерасад.
Сокинони деҳа шикоят доранд, ки бо сабаби набудани ибодатгоҳ маҷбуранд, барои адои намоз ба деҳаҳои ҳамсоя раванд.
Баъзе аз онҳо далели мақомотро барои ба таъхир гузоштани таъмири масҷид "ҳадафмандона" медонанд.
Кишварҳои ғарбӣ ва созмонҳои ҳомии ҳуқуқ, мақомоти Тоҷикистонро барои маҳдуд кардани озодиҳои динӣ танқид мекунанд.
Аз ҷумла Кумисюни байнулмилалии Амрико дар мавриди озодиҳои динӣ моҳи март гуфт, ки соли 2024 вазъи озодиҳои динӣ дар Тоҷикистон "ниҳоят бад" шуд. Мақомоти тоҷик дар гузашта ин гуна танқидҳоро рад кардаанд.
Тибқи омор, дар Тоҷикистон беш аз чор ҳазор масҷидро ба рӯйхат гирифтаанд. Як масҷид ба сари ду-дуним ҳазор кас.
Аксари онҳо масҷидҳои панҷвақта ҳастанд, вале сокинон ҳар чанд вақт аз душвории сабтином ва ё эҳтимоли баста шудани ибодатгоҳҳо шикоят мекунанд.
Дар Маскав як таксирони қирғизро латукӯб кардаанд
Дар Маскав як таксирони муҳоҷир аз Қирғизистонро латукуб карданд.
Эрнис Бердиев, мусофиркаши қирғиз мегӯяд, ҳодиса баъд аз зӯҳри 29 март дар Маскав рух дод.
Ба гуфтаи Эрнис, вақте ӯ аз мусофирон хостааст, ки пули роҳро пешпардохт кунанд, дар ҷавоб вайро таҳқир карда, сипас латукӯб мекунанд.
Дар расонаҳо навори ҳодиса аз дурбини таксӣ ҳам нашр шудааст, ки дар он латукуби Эрнис дида мешавад. Эрнис мегӯяд, ки дар мошин ду мард ва ду духтар буданд.
"Яке аз онҳо маро дашном дод, ман хомӯш наистодам, баъди даст бардоштани яке аз онҳо, худамро ҳимоя кардам",-гуфтааст ӯ.
Латукӯби ронандагони муҳоҷир ҳодисаи нав нест. Онҳо дар Русия аксаран мавриди ҳамла ва ё латукӯб қарор мегиранд.
Маркази назорати экстремизм бо номи "Сова" дар таҳқиқе гуфтааст, ки аз соли 2023 ба ин тараф бархурди нажодапарастона бо муҳоҷирон дар Русия афзоиш ёфтааст.
Ҳалокати як мард дар Дарвоз
Кумитаи ҳолатҳои фавқулодаи Тоҷикистон аз марги як сокини ноҳияи Дарвоз хабар дод, ки аз кӯҳ афтода ва ҷон бохтааст.
Ба иттилои ин ниҳод, марди 34-сола, сокини деҳаи Паткунови ҷамоати деҳоти Қалъаи Хумб, субҳи 2-юми апрел бо мақсади ҷамъоварии чукрӣ ба кӯҳҳои наздики деҳа рафта буд.
"Вале бинобар лағжанда будани замин пас аз боришоти зиёд, ӯ аз баландии 60 метр ба замин афтода ва дар ҷояш ҷон додааст",-омадааст дар хабар.
Ҷасади ин мард баъд аз зуҳри ҳамон рӯз аз ҷониби сокинони маҳаллӣ ёфт шуда, ба наздиконаш супурда шудааст.
Кумитаи ҳолатҳои фавқулода аз сокинон хостааст, ки дар шароити обу ҳавои номусоид аз сафар ба кӯҳҳо худдорӣ намоянд.
Маҷористон аз Додгоҳи Байнулмилалии Ҷиноӣ берун мешавад
Мақомоти Маҷористон ё Венгрия гуфтанд, ки ин кишвари аврупоӣ аз Додгоҳи Байнулмилалии Ҷиноӣ берун хоҳад шуд.
“Давлат раванди хуруҷро рӯзи 3-юми апрел мутобиқ бо Қонуни асосӣ ва байнулмилалӣ оғоз хоҳад кард,” – гуфт як намояндаи ҳукумати Маҷористон.
Ин тасмим дар замоне эълон гашт, ки Бенямин Нетаняҳу, сарвазири Исроил, дар Будапешт қарор дорад.
Пештар Додгоҳи Байнулмилалии Ҷиноӣ ҳукми боздошти Нетаняҳуро содир карда буд.
Ӯро ба ҷинояти ҷангӣ дар Ғазза гумонзад медонанд. Ҷое, ки аз моҳи октябри соли 2023 даргирии нерӯҳои Исроил бо ҷангҷӯёни “Ҳамос” идома дорад. Амрико ва Иттиҳоди Аврупо “Ҳамос”-ро созмони террористӣ медонанд.
Мақомоти Исроил қарори Додгоҳи Байнулмилалии Ҷиноиро беасос хонаанд.
Сафари Эмомалӣ Раҳмон ба Узбекистон барои ширкат дар нишасти Самарқанд
Эмомалӣ Раҳмон, раисҷумҳури Тоҷикистон, рӯзи 3-юми апрел ба Узбекистон рафт.
Ӯ рӯзҳои 3 ва 4-уми апрел дар нишасти сарони давлатҳои Осиёи Марказӣ ва Иттиҳоди Аврупо дар Самарқанд иштирок мекунад.
Ин нишасти нахустини тарафҳост.
“Нишасти Самарқанд нишон хоҳад дод, ки Иттиҳоди Аврупо то чӣ ҳад ба ҳамкории мунтазам ва дарозмуддат бо Осиёи Марказӣ омода аст. Душвории асосӣ барои Брюссел рақобат бо манфиатҳои Чин ва Русия дар минтақа хоҳад буд”, -- мегӯяд Мирҳат Шарифҷон, таҳлилгари Радиои Аврупои Озод/Радиои Озодӣ.
Иттиҳоди Аврупо солҳо боз бо кишварҳои Осиёи Марказӣ, аз ҷумла Тоҷикистон, ки бештар зери нуфузи Русия ҳастанд, равобит дорад. Иқтисоду дигаргунии иқлим, таъмини об ва риояи ҳуқуқи одамон аз мавзуъҳои асосии ҳамкории ду тараф будааст.
Вале бино бар санаде, ки Радиои Озодӣ рӯзи дувуми апрел дид, ҷонибҳо дар нишасти Самарқанд ба истиснои ташаббуси Global Gateway, ки ҳамчун алтернативаи тарҳи "Як камарбанд - як роҳ"-и Чин номбар мешавад, масъалаи Афғонистону мубориза бо таҳдидҳо, давр задани таҳримҳо, волоияти қонуну озодиҳои бунёдӣ ва ҷомеаи шаҳрвандиро низ баррасӣ ва ё ҳадди ақал дар бораи онҳо ишора хоҳанд кард.
Созмони байнулмилалии Human Rights Watch як ҳафта пеш аз намояндагони Иттиҳоди Аврупо талаб карда буд, ки дар гуфтугӯ бо мақомоти Осиёи Марказӣ ба риояи ҳуқуқи инсон таваҷҷуҳ кунанд.
Чун, ба гуфтаи Искра Кирова, мудири созмон дар умури кишварҳои Аврупо ва Осиёи Марказӣ, "ҳабси мунтақидону фаъолон ва маҳдудияти кори ҷомеаи маданӣ ва матбуоти мустақил дар минтақа ба гумон аст, ки ба пешрафте, ки Иттиҳоди Аврупо дар фикри он аст, мусоидат намояд."
Аммо Шавкат Мирзиёев, раисҷумҳури Узбекистон, дар остонаи нишаст ва дар мусоҳиба бо шабакаи Euronews бештар ба масъалаҳои иқтисодӣ ва сармоягузориву рушди устувор бо Иттиҳоди Аврупо таъкид кардааст. Ба иттилои ӯ, дар ҳафт соли охир додугирифт байни кишварҳои Осиёи Марказӣ ва Аврупо афзуда, ба 54 миллиард евро расидааст.
Панҷ кишвари Осиёи Марказӣ солҳои охир барои саркӯби мунтақидон, боздошту ҳабси рӯзноманигорон ва поймоли ҳуқуқи бунёдии сокинон танқид мешаванд. Ҳукуматдории тӯлонӣ ва интихоботҳои бидуни рақобат ва ё олуда ба тақаллуб аз камбудҳои дигари онҳо шумурда мешавад.
Як мансабдори баландпояи Русия ба Вашингтон рафтааст
Кирилл Дмитриев, намояндаи вижаи Русия дар умури сармоягузории хориҷӣ ва ҳамкориҳои иқтисодӣ, рӯзи 2-юми апрел барои суҳбат дар бораи хатми ҷанг дар Украина ва истиқрори оташбас ба Вашингтон рафтааст.
Хабаргузории "Рейтерс" бо такя ба ду манбаъ рӯзи 3-юми апрел хабар дод, ки Дмитриев бо даъвати расмӣ вориди Вашингтон шуд.
Кохи Сафед иттилоъро тасдиқ накардааст.
Ба гузориши "Рейтерс", Стив Виткофф, намояндаи вижаи Амрико дар умури Ховари Миёна, бо дастури Кохи Сафед ва Департаменти давлатӣ ҳафтаи гузашта Дмитриевро даъват карда, барои дарёфти раводиди кӯтоҳмуддат ба ӯ ёрӣ додааст.
Аз оғози ҳамлаи Русия ба Украина дар соли 2022 бори аввал аст, ки як мансабдори баландпояи Русия аз Вашингтон боздид мекунад.
Доналд Трамп, раисҷумҳури Амрико, чанде пеш аз ҷараёни кунди музокироти оташбас барои хатми ҷанг дар Украина ва рафтори Владимир Путин, президенти Русия, изҳори норизоятӣ кард.
Вай рӯзи 2-юми апрел ҳангоми эълони боҷи изофӣ барои бисёре аз кишварҳо, аз ҷумла Иттиҳоди Аврупо, бори дигар ба пойбандии худ барои поён додани ҷанг дар Украина таъкид намуд.
"Саломатияш хуб нест." Озодии "табиб"-и Алии Бедакӣ аз зиндон
Абдулло Вазиров, ҷарроҳи 78-сола аз ноҳияи Рашт, ки соли 2023 бо гумони ҳамкорӣ бо гурӯҳҳои ифротӣ боздошт ва панҷ сол ҳабс шуда буд, қабл аз муҳлат аз зиндон раҳо гардидааст.
Пайвандонаш рӯзи 2-юми апрел дар суҳбат бо Радиои Озодӣ гуфтанд, ки раҳоии ӯ бар асоси фармони раисҷумҳури Тоҷикистон имконпазир гашт.
Эмомалӣ Раҳмон рӯзи 20-уми марти имсол қарори раҳоии наздик ба нуҳсад зиндониро имзо гузошт ва онро “бахшиши гуноҳ” номид.
Абдулло Вазиров дар наворе, ки телевизионҳои Тоҷикистон нашру паҳн карданд, озодиро “неъмати беҳтарин” донистааст.
Наздиконаш гуфтанд, ӯ ҳоло дар деҳаи Муллобароти ноҳияи Рашт қарор дорад, “аммо вазъи саломатияш чандон хуб нест”.
Абдулло Вазиров дар гузашта бо гумони кумак ба Аловуддин Давлатов, машҳур ба Алии Бедакӣ, низ зиндонӣ ва бар асоси қонуни авф озод шуда буд. Ӯ худашро бегуноҳ медонист.
Мақомот Алии Бедакиро ба созмон додани ҳамла ба корвони нерӯҳои Вазорати дифои Тоҷикистон дар соли 2010 гунаҳкор карданд. Дар он ҳамла 26 сарбоз кушта шуд.
Амрико шабакаи таъмини қисмҳои дронро дар Эрон таҳрим кард
Иёлоти Муттаҳидаи Амрико рӯзи 1-уми апрел як шабакаи иборат аз 6 ниҳод ва ду шахсро таҳрим кард.
Онҳо барои бо қисмҳои дрон ё ҳавопаймоҳои бесарнишин таъмин кардани ширкати "Quds Aerospace Industries" дар Эрон муттаҳам ҳастанд.
Ба гузориши Радиои Фардо, бахши эронии Радиои Озодӣ, ин шабака ҳамчунин дар расондани таҷҳизот ба ширкати саноати ҳавопаймоии Эрон ва Гурӯҳи саноатии Шаҳид Боқирӣ нақш доштааст.
Шабакаи таҳримшуда дар Эрон, Имороти Муттаҳидаи Араб ва Чин ҷойгир аст.
Вазири молияи Амрико гуфт, густариши ҳавопаймоҳои бесарнишин ва мушакҳои Эрон ба ҷони ғайринизомиён, нерӯҳои Амрико ва муттаҳидони ин кишвар таҳдид мекунад.
Пентагон: “Карл Винсон” ба Ховари Миёна меравад
Артиши Амрико эълон кард, ки дастаи дигаре аз киштиҳои ҳавопаймобарро барои муқобила бо таҳдидҳо ба Ховари Миёна хоҳад фиристод.
Ба гузориши Радиои Аврупои Озод/Радиои Озодӣ, ин иқдом дар ҳолест, ки нерӯҳои амрикоӣ ҳамчунон ба макони шӯришиёни ҳусии Яман аз киштиҳои худ дар Баҳри Сурх ҳамла мекунанд.
Шӯришиёни ҳусиҳои Яман аз пуштибонии Эрон баҳравар ҳастанд.
Шон Парнел, сухангӯйи Вазорати дифои Амрико ё Пентагон, рӯзи якуми апрел гуфт, киштии ҳавопаймобари “Карл Винсон” ба “Ҳарри Труман” дар Ховари Миёна хоҳад пайваст.
Вай афзуд, ҳадаф идомаи мусоидат ба суботи минтақа, пешгирӣ аз таҷовуз ва ҳифзи гардиши озоди тиҷорат дар минтақа аст.
Ин эълон дар ҳолест, ки нерӯҳои амрикоӣ тақрибан ҳамарӯза ба мавқеи ҳусиҳо дар Яман ҳамлаҳои ҳавоӣ мекунанд, то таҳдиди онҳо ба киштиҳои ғайринизомӣ ва киштиҳои низомӣ дар минтақа бас гардад.
Зеленский гуфт, Ғарб фиристодани нерӯро ба Украина баррасӣ мекунад
Раҳбарони бахши низомӣ дар Ғарб эҳтимоли фиристодан ва ҷо ба ҷо кардани нерӯҳоро дар Украина баррасӣ хоҳанд кард. Мулоқот рӯзи чоруми апрел дар назар аст.
Президенти Украина Владимир Зеленский шоми 1-уми апрел дар паёми видеоӣ гуфт, ин нерӯҳо оташбаси эҳтимолиро назорат карда, бахше аз сохтори нави амниятии ин кишвар хоҳанд буд.
“Артиши Украина бояд ба қадри кофӣ нерӯманд бошад ва дар ин замина тамоми сохтори амниятӣ бунёд мешавад,” – афзуд ӯ.
Зеленский рӯзи якуми апрел бо вазири корҳои хориҷии Олмон Анналена Бербок дар Киев мулоқот кард ва гуфт, ки “доираи маҳдуди кишварҳо” омодаанд, ба Украина нерӯ фиристанд.
Раҳбари Украина дар нишасти матбуотии муштарак бо Бербок изҳор дошт, ки ӯ мунтазири “посухи мушаххастар” аз ҷониби кишварҳои ҳампаймон аст.
То кунун Фаронса ва Бритониё омодагии худро барои ирсоли нерӯҳо бо ҳадафи назорат аз оташбаси эҳтимолӣ дар Украина изҳор доштаанд. Русия ба ҳама гуна ирсоли нерӯи хориҷӣ ба Украина шадидан мухолиф аст.
Владимир Зеленский ҳамчунин гуфт, Украина “тамоми маълумоти заруриро дар бораи қонуншиканиҳои Русия дар бахши энержӣ” бо шарикони амрикоии худ дар миён гузоштааст.
Дар ҳоле ки, ба гуфтаи вай, нерӯҳои Русия рӯзи 1-уми апрел ба Херсон зарба зада, бо ҳавопаймои бесарнишин як иншооти энергетикиро ҳадаф қарор доданд. Як қисми шаҳр бе барқ мондааст.
Ҷасади як сарбози дигари Амрикоро дар Литва ёфтанд
Ҷасади як сарбози дигари Амрикоро дар Литва пайдо кардаанд.
Дар ин бора артиши Иёлоти Муттаҳида рӯзи 1-уми апрел хабар дод.
Аз ин пеш ҷасади се сарбози амрикоӣ ёфта шуда буд.
Ин чор нафар, ки савори мошини зиреҳпӯши М88 Hercules-и артиши Амрико буданд, рӯзи 25-уми марти имсол ҳангоми тамрин дар Литва бедарак гаштанд.
Дертар маълум шуд, ки нақлиёти онҳо ба ботлоқзор афтодааст. Мошинро рӯзи 31-уми март берун оварданд.
Фармондеҳии артиши Амрико қаблан дар бораи сарнавишти низомиён хабар надода буд.
Доналд Трамп ба Арабистони Саудӣ меравад
Доналд Трамп, раисҷумҳури Амрико, ба Арабистони Саудӣ меравад.
Ба иттилои расонаҳои амрикоӣ, мумкин аст, Трамп дар миёнаҳои моҳи майи имсол ба Арабистони Саудӣ сафар кунад.
Ин сафари аввалини хориҷии ӯ дар давраи дувуми президентияш хоҳад буд.
Ӯ дар давраи аввали президентии худ низ нахустин сафарашро ба Арабистони Саудӣ анҷом дода буд.
Трамп дар ҳоле нияти сафар ба Арабистони Саудиро дорад, ки Амрико дар талош аст оташбасро дар Ғазза барқарор кунад.
Амрико бо Қатар ва Миср аз миёнаравҳои музокирот миёни Исроил ва гурӯҳи фаластинии "Ҳамос" мебошанд. Амрико ва Иттиҳоди Аврупо "Ҳамос"-ро созмони террористӣ мехонанд.
UNICEF: Дар ҳамлаҳои охири Исроил беш аз 300 кӯдак кушта шудаанд
UNICEF, Бунёди ҳимоят аз кӯдакони Созмони Милал, ибрози нигаронӣ кард, ки дар 10 рӯзи гузашта дар ҳамлаҳои Исроил дар Ғазза беш аз 320 кӯдак кушта ва 609 тан захмӣ шудаанд. Нерӯҳои Исроил дар онҷо ҷангҷӯёни "Ҳамос"-ро нишон гирифтааст, ки Амрико ва Иттиҳоди Аврупо созмони террористӣ медонанд.
Ин ниҳод дар эъломияе дар вебсайти худ навишт, омор нишон медиҳад, ки пас аз шикасти оташбас дар Ғазза рӯзона ҳудуди 100 кӯдак кушта ё маъюб мешаванд.
Ба иттилои UNICEF, дар 18 моҳи гузашта дар Ғазза 15 ҳазор кӯдак кушта ва беш аз 34 ҳазор кӯдак захмӣ шудаанд. Ҷанг ҳамчунин як миллион кӯдакро овора карда, онҳоро аз дастрасӣ ба ғизо, оби ошомиданӣ ва хадамоти тандурустӣ маҳрум кардааст.
Катерина Руссел, мудири масъули UNICEF, дар вокуниш ба ин вазъият гуфт, "оташбас дар Ғазза барои кӯдакони ин минтақа умеде барои наҷот ва беҳбуди вазъ буд, аммо акнун бори дигар кӯдакон дар гирдоби хушунати маргбор ва маҳрумият фурӯ рафтаанд".
Бунёди ҳимоят аз кӯдакони Созмони Милал ҳамлаҳоро нақзи ошкори қонунҳои байнулмилалии башардӯстона хонда, аз ҳама тарафҳо хостааст, ба даргириҳо дар Ғазза поён дода, оташбасро барқарор намоянд.
"Даъвои Зарифӣ, Ҳакимов, Атоӣ ва Ғанизода шунида шуд"
"Даъвои Ҳамрохон Зарифӣ, Шокирҷон Ҳакимов, Абдулфайз Атоӣ ва Нураҳмад Ғанизода шунида шуд." Як манбаи огоҳ аз парвандаи машҳури "табаддулот" дар Тоҷикистон, ки нуҳ касро дар бар мегирад, рӯзи аввали баррасии шикояти маҳкумшудаҳоро чунин тасвир кард, аммо ҷузъиёт надод. Қаблан онҳо худро бегуноҳ дониста буданд.
Баррасии шикояти маҳкумшудаҳо рӯзи 1-уми апрел ботаъхир, вале чун баррасиҳои зинаи аввал паси дарҳои баста, бе ҳузури пайвандон ва хабарнигорон дар Боздоштгоҳи муваққати шаҳри Душанбе доир шуд. Танҳо вакилони мудофеъро роҳ доданд.
Ҷаласа рӯзи 2-юми апрел давом мекунад ва интизор меравад, ки даъвои боқии маҳкумшудаҳо ва вакилони дифояшон шунида шавад. Бо фарқ аз додгоҳи марҳилаи аввал, ҷаласаи зинаи кассатсиониро се додраси Додгоҳи олӣ доварӣ мекунанд.
Додгоҳи олии Тоҷикистон дар моҳи феврал ва пас аз баррасии беш аз ҳафтмоҳа 9 тан аз чеҳраҳои маъруфи сиёсӣ ва иҷтимоиро бо иттиҳоми хиёнат ба давлат, кӯшиши табаддулот ва ғасби ҳокимият аз 8 то 27 сол зиндонӣ кард:
- Ҳамроҳхон Зарифӣ, вазири пешини корҳои хориҷӣ – 27 сол;
- Саидҷаъфар Усмонзода, раиси пешини Ҳизби демократ ва вакили собиқи порлумон – 27 сол;
- Ҷамшед Боев, сарҳанги бознишастаи амният – 21 сол;
- Аҳмадшо Комилзода, рӯзноманигор ва муовини пешини раиси Ҳизби демократ – 19 сол;
- Акбаршо Искандаров, раиси собиқи Шӯрои олӣ – 18 сол;
- Шокирҷон Ҳакимов, муовини аввали раиси Ҳизби сотсиал-демократ – 18 сол;
- Нурамин Ғанизода, сарҳанги бознишастаи амният – 18 сол;
- Абдулфайз Атоӣ, сардори пешини раёсати ВКХ – 17 сол;
- Рухшона Ҳакимова, хабарнигор ва бародарзодаи Шокирҷон Ҳакимов –8 сол.
Наздикони баъзе аз онҳо рӯзи 17-уми феврал хоҳони бозбинии ҳукм, озодии пайвандон ва бекор шудани мусодираи молу амвол шуданд. Ҳамчунин, 130 бонуи фаъол дар номае аз раисҷумҳури Тоҷикистон озодии Рухшона Ҳакимова, рӯзноманигор ва модари ду кӯдакро дархост карданд.
Ба иттилои дарёфтии Радиои Озодӣ аз пайвандони маҳкумшудагон, онҳо то ҳол натавонистаанд, ки наздиконашонро дар Боздоштгоҳ бубинанд. Дар Додгоҳи олӣ ба онҳо гуфтаанд, ки "ҳоло иҷоза нест, мунтазир шавед."
Вакили мудофеи яке аз маҳкумшудаҳо ба Радиои Озодӣ гуфт, онҳо дар ин бора ба сардори Раёсати зиндонҳои Тоҷикистон ҳам нома фиристоданд, "вале ҳеч ниҳод посух надод".
Видеоро дар инҷо бинед:
Матвеев хост, кӯдакони муҳоҷирон аз Русия ронда шаванд
Михаил Матвеев, вакили Думаи давлатии Русия, талаб кардааст, ки кӯдакони муҳоҷирон аз ин кишвар ихроҷ карда шаванд.
Матвеев бо нафраташ ба муҳоҷирон машҳур мебошад.
Ӯ дар шабакаи иҷтимоии "Телеграм" навишт, ки дар Русия тахминан 800 ҳазор хориҷии синну соли мактабӣ ба сар мебаранд. Аз ин байн, ба гуфтаи ӯ, танҳо 25 дарсад бо таҳсил дар мактабҳо фаро гирифта шудаанд.
Матвеев нусхаи як санади Вазорати корҳои дохилии Русияро намоиш дод, ки тибқи он 75 дарсади фарзандони муҳоҷирон дар мактабҳо намехонанд.
Ин вакили мардумии Русия иброз доштааст, ки қариб ним миллион фарзандони муҳоҷирон ба истилоҳ "кӯчагард" ҳастанд.
"Онҳо дар инҷо ба кӣ даркоранд? Кӣ метавонад фаҳмонад? Ним миллион кӯдаки аз таҳсил маҳруми муҳоҷирон! Онҳо майдончаҳои бозии фарзандони моро банд мекунанд. Онҳо дар "галлаи гургон" ҷамъ шуда, дар ҷустуҷӯйи моҷаро ба марказҳои тиҷорат рафта, атфоли моро туъмаи ҳамлаҳояшон мекунанд. Онҳо аллакай ғорату таҷовуз мекунанд ва мекушанд," – гуфт ӯ.
Баъзе аз муҳоҷирони тоҷик инро баҳонае барои сахттар кардани ҳузури онҳо ва аъзои оилаашон дар Русия медонанд.
Аз якуми апрел дар Русия қонуне ба иҷро даромад, ки бар пояи он фарзандони муҳоҷирон қабл сабтином дар мактабҳо бояд имтиҳони забони русӣ супоранд. Ҳар касе, ки аз имтиҳон нагузашт, метавонад худро ба таҳсили иловагӣ номнавис кунад.
Дар як соли охир ва бахусус баъд аз ҳамла ба толори "Крокус" дар наздикии Маскав, қонунҳои вобаста ба муҳоҷирати корӣ дар Русия сахттар шуд.
Видеоро дар инҷо бинед:
Чаппа шудани кӯҳпора дар Хатлон; як кас маҷруҳ шуд
Бар асари чаппа шудани кӯҳпора дар роҳи Леваканд-Данғараи вилояти Хатлон як кас маҷруҳ шуда, дар бемористон бистарист.
Кумитаи ҳолатҳои фавқулодаи Тоҷикистон рӯзи 1-уми апрел гуфт, ба ду мошин ё худрави “Mercedes Benz” ва “Opel Zafira” низ зарар расид.
Бино ба наворҳое, ки дар шабакаҳои иҷтимоӣ нашр шуд, ду мошин қисман зери санг мондаанд ва роҳ бастааст.
Мақомот мегӯянд, роҳро пок карданд ва ҳаракати мошинҳо ба ду самт таъмин шуд.
Шоҳроҳи Бохтар-Леваканд-Кӯлоб панҷ моҳ пеш бозсозӣ шуда буд.
Ҷасади се низомии амрикоӣ дар Литва пайдо шудааст
Аз чор сарбози амрикоӣ, ки ҳангоми тамрин дар Литва бедарак шуда буданд, ҷасади се нафари онҳо пайдо шудааст. Ҷустуҷӯи сарбози чорум идома дорад. Дар ин бора фармондеҳии нерӯҳои мусаллаҳи ИМА дар Аврупо ва Африқо хабар додааст.
Дар хабари расмӣ омадааст, мақомоти Литва ва Лаҳистон барои пайдо кардани сарбозон ёрӣ расондаанд.
Мошини зиреҳпӯши М88 Hercules-и артиши Амрико, ки дар тамрини низомӣ ширкат дошт, рӯзи 25-уми март бо чор низомӣ бедарак шуд. Дертар маълум шуд, ки нақлиёт ба бероҳа рафта, ба ботлоқ афтидааст. Рӯзи 31-уми март мошинро берун оварданд.
Марк Рютте, дабири кулли НАТО дар ҷараёни сафараш ба Вашингтон гуфт, ки низомиён ҷон бохтаанд.
Фармондеҳии артиши Амрико қаблан дар бораи сарнавишти низомиён расман хабар надода буд.
Арманистон дигар барои СПАД пул намедиҳад
Арманистон эълон кардааст, ки дигар пули солонаи Созмони Паймони Амнияти Дастаҷамъӣ (СПАД)-ро намедиҳад.
Вазорати корҳои хориҷии Арманистон ба хабаргузории русии "Спутник" гуфтааст, ки аз ин тасмимаш СПАД-ро огоҳ кард. Ин кишвар қарор "Дар бораи буҷаи СПАД дар соли 2024"-ро имзо накарда, гуфтааст, дигар маблағгузориро идома нахоҳад дод.
Соли гузашта Никол Пашинян, сарвазири Арманистон эълон кард, ки кишвараш аз узвият дар СПАД хориҷ мешавад.
Эътирози Арманистон ин аст, ки СПАД дар ҷанг дар Қарабоғи Кӯҳӣ вазифаҳои худро иҷро накард.
Қарабоғи Кӯҳӣ аз соли 1990 то соли 2023 аз ҷониби араманитаборони тарафдори Арманистон идора мешуд. Ҷомеаи ҷаҳонӣ ин минтақаро хоки Озарбойҷон медонист. Соли 2023 Озарбойҷон бо баргузории як амалиёти низомӣ онро дубора аз худ кард.
СПАД, як созмонест, ки пас аз пошхӯрии Иттиҳоди Шӯравӣ аз ҷониби Русия таъсис ёфт ва ҳоло Қазоқистон, Қирғизистон, Русия, Белорус ва Тоҷикистон шомили он ҳастанд.
Таркиш дар як масҷиди Узбекистон. Се кас ҷон бохт
Дар таркише дар як масҷиди Узбекистон се намозгузор ҷон бохта, даҳ нафар захмӣ шудаанд.
Мақомоти маҳаллӣ гуфтанд, ки масҷид аз таркидани газ вайрон гашт.
Беҳзод Ҳидоятов, сухангӯи сарвазири Узбекистон, гуфт, ҳодисаро як кумисюни ҳукуматӣ тафтиш мекунад.
Расонаҳои маҳаллӣ аз ҷойи ҳодиса навор нашр карданд. Ба навиштаи онҳо, лӯлаи газ дар таҳоратхонаи масҷиди Андиҷон таркидааст.
Дар навор дида мешавад, ки дар натиҷаи таркиш девору боми масҷид хароб шуда, вале сӯхтор рух надодааст.
Гурӯҳи корӣ маҳалли ҳодисаро поккорӣ мекунад.
Раёсати корҳои дохилии вилояти Андиҷони Узбекистон гуфт, лӯлаи газ дар таҳхонаи як масҷид шикоф шуда, газ ба таҳоратхонаву масҷид дохил шуд ва ҳангоми рӯшан кардани барқ таркиш шуд.
Раҳбари сербҳои Босния гуфт, ба Маскав рафтааст
Раҳбари сербҳои Босния Милорад Додик рӯзи 31-уми март эълон кард, ки ба Маскав рафтааст.
Додик дар шабакаҳои иҷтимоӣ видеои худро дар назди Оромгоҳи Сарбози Номаълум дар девори Кремл нашр кард.
Ин сафари ӯ баъд аз он сурат гирифт, ки додситонҳои Босния ва Ҳерзеговина рӯзи 27-уми март вайро ба поймоли Қонуни асосӣ муттаҳам карда, дархости ҳабси ӯро доданд.
“Ҳар дафъае, ки ба инҷо меоям, сафарро бо зиёрати Оромгоҳи Сарбози Номаълум оғоз мекунам, то эҳтироми 28 миллион русеро, ки дар Ҷанги Дуюми Ҷаҳонӣ ҳалок шудаанд, ба ҷо орам", -- гуфт Милорад Додик дар наворе, ки дар “X” нашр шуд.
Ӯ барномаи сафари худро эълон накард, аммо гуфт, “боз 9-уми май бо даъвати президенти Русия, Владимир Путин, дар ин ҷо хоҳам буд, то 80-умин солгарди пирӯзӣ бар фашизмро ҷашн гирам.”
Милорад Додик дар айни замон зери таҳримҳои Амрико ва Бритониё қарор дорад.
Омодагии шаш кишвар барои фишори бештар ба Русия
Олмону Фаронса, Итолиё, Лаҳистон, Испания ва Бритониё рӯзи 31-уми март омодагии худро барои сахттар кардани таҳримҳо алайҳи Русия баён доштанд.
Дар ин бора дар изҳороти муштараки вазирони корҳои хориҷии шаш кишвар ва масъули сиёсати берунии Иттиҳоди Аврупо Кая Каллас таъкид шудааст.
Дар изҳорот омадааст, ки шаш кишвар омодаанд, бо истифода аз тамоми абзор ё василаҳои мавҷуд ба Русия фишор биоранд, то ҷангро зидди Украина бас кунад.
Вазирон бори дигар изҳор доштаанд, ки то замоне Русия ҷангро қатъ накунад ва ба Украина ҷуброни зарар напардозад, дороиҳои Маскав дар кишварҳои ғарбӣ баста бимонанд.
Мувофиқи изҳорот, кишварҳо инчунин ҳеч созишномаи сулҳеро, ки “саноати низомӣ ва дифоии Украина ё ҳузури ҳарбии кишварҳои ҳампаймонро дар Украина” маҳдуд мекунад, қабул надоранд.
