Додгоҳи олии Тоҷикистон ҳукми 9 нафарро дар доираи парвандаи “табаддулот” бетағйир гузошт.
Ин гурӯҳи иборат аз сиёсатмадорону мансабдорони пешин ва як рӯзноманигор дар моҳи феврал бо иттиҳоми “хиёнат ба давлат” ва “кӯшиши табаддулот” аз 8 то 27 сол зиндонӣ карда шуданд. Худашон онро беасос медонанд ва аз мақомот хоста буданд, ки ҳукмро бознигарӣ ва қарори мусодираи амволро бекор кунанд.
Хулосаи се додрас дар бораи бетағйир мондани ҳукми онҳо рӯзи 2-юми апрел дар Боздоштгоҳи муваққатии шаҳри Душанбе паси дарҳои баста эълон шуд.
Яке аз вакилони мудофеи маҳкумшудагон бо шарти фош нашудани номаш гуфт, ки “ҳукми зинаи аввал бетағйир монд, баромади маҳкумшудаҳо ва шикояти вакилон ба назар гирифта нашуд, ҳатто нисбати Рухшона.”
Намояндагони Додгоҳи олӣ ҳеч шарҳе намедиҳанд.
Додрасҳо рӯзи якуми апрел даъвои Ҳамроҳхон Зарифӣ, вазири пешини корҳои хориҷӣ; Шокирҷон Ҳакимов, муовини аввали раиси Ҳизби сотсиал-демократ; Абдулфайз Атоӣ, дипломати собиқ ва Нураҳмад Ғанизода, афсари бознишастаи амниятро шуниданд.
Дар рӯзи дувуми апрел даъвои Акбаршо Искандаров, раиси пешини Шӯрои олӣ; Аҳмадшо Комилзода, муовини раиси Ҳизби демократ; Саидҷаъфар Усмонзода, вакили собиқи порлумон ва рӯзноманигор Рухшона Ҳакимова шунида шудааст.
Ба қавли яке аз вакилони мудофеъ, “дар рӯзи аввал Шокирҷон Ҳакимов наздик ба ду соат сухан гуфта, нукта ба нуктаи ҳукми додгоҳи аввалро бар асоси қонунгузории Тоҷикистон бепоя хонд ва ба бегуноҳии худ пойфишорӣ кард”.
Ҳамчунин, ба гуфтаи ин вакил, “боқии маҳкумшудаҳои парванда низ ба бегуноҳии худ таъкид карда, аз додрасҳо хостанд, ки онҳоро озод кунанд.”
Баррасии шикояти маҳкумшудаҳо то нимаи аввали рӯзи дувуми апрел давом карда, додрасҳо дар зарфи 10-15 дақиқа тасмими худро эълон намуданд.
Наздикони маҳкумшудаҳо бо расонаҳо ошкоро суҳбат намекунанд, вале яке аз онҳо дар суҳбати бидуни микрофон ба Радиои Озодӣ гуфт, “чизе шуд, ки интизораш буданд”.
Ҳоло ба гуфтаи яке аз вакилони дифоъ, пас аз панҷ рӯзи ин ҷаласа ҳукми зинаи аввал эътибори қонунӣ пайдо мекунад.
Дар ҳамин ҳол, манобеи огоҳи Радиои Озодӣ гуфтанд, ки пайвандони маҳкумшудагон аз моҳи июни соли 2024 то кунун натавонистаанд, ки онҳоро дар Боздоштгоҳ бубинанд. Дар Додгоҳи олӣ бе пешниҳоди кадом асоси ҳуқуқие ба онҳо гуфтаанд, ки “ҳоло қатъиян иҷоза нест, мунтазир шавед”, вале маълум нест то кай.
Кӣ чанд сол зиндонӣ шуд?
Ҳамроҳхон Зарифӣ, вазири пешини корҳои хориҷӣ – 27 сол;
Саидҷаъфар Усмонзода, раиси пешини Ҳизби демократ ва вакили собиқи порлумон – 27 сол;
Ҷамшед Боев, сарҳанги бознишастаи амният – 21 сол;
Аҳмадшо Комилзода, рӯзноманигор ва муовини пешини раиси Ҳизби демократ – 19 сол;
Акбаршо Искандаров, раиси собиқи Шӯрои олӣ – 18 сол;
Шокирҷон Ҳакимов, муовини аввали раиси Ҳизби сотсиал-демократ – 18 сол;
Нурамин Ғанизода, сарҳанги бознишастаи амният – 18 сол;
Абдулфайз Атоӣ, сардори пешини раёсати ВКХ – 17 сол;
Рухшона Ҳакимова, хабарнигор ва бародарзодаи Шокирҷон Ҳакимов – 8 сол.
