Раҳматилло Зоиров, раиси Ҳизби сотсиал-демократ, хостори ислоҳи қонун дар бораи интихоботи президенти Тоҷикистон ва ҳуқуқи бештар ба муҳоҷирон шуд.

Ӯ рӯзи 25-уми май дар ин замина ба раиси ҷумҳурӣ ва порлумон 16 пешниҳоди худро ироа кард. Баъзе аз пешниҳодҳо ворид кардани тағйирот ба Қонуни асосиро дар назар дорад.

Интизор меравад, интихоботи навбатии президентӣ моҳи ноябри имсол баргузор шавад.

Пешниҳоди аввали Зоиров ин аст, ки то замони эъломи интихоботи президентӣ феҳраст ё рӯйхатти ягонаи интихобкунандаҳоро тартиб диҳанд. Тоҷикистон то кунун феҳрасти ягонаи интихобкунандагонро надорад ва набуди чунин рӯйхат, ба гуфтаи таҳлилгарон, роҳро барои тақаллуб дар интихобот мекушояд.

Раиси Ҳизби сотсиал-демократи Тоҷикистон, инчунин, хостааст, мақомот меъёри чӣ гуна пешниҳод шудани номзад ба мақоми президент аз байни муҳоҷиронро муқаррар кунанд. "Ҳуқуқи муҳоҷирони меҳнатӣ барои ҷамъоварии имзоҳо ба номзад ба мақоми президент ва механизми тасдиқи он дар қонуни интихобот муқаррар гардад. Интихоботи президентӣ дар асоси овоздиҳии электронӣ амалӣ шавад", - афзудааст ӯ.

Раҳматилло Зоиров дар пешниҳодҳояш ба масъалаи ҷамъоварии имзоҳо низ дахл карда, гуфтааст, дар баробари ҷамъоварии имзо дар интихоботи президентӣ ҳамчун алтернатива "гаравпулӣ ба маблағи 100 ҳазор сомонӣ" муқаррар карда шавад. Соли 2013 номзадии Ойниҳол Бобоназарова танҳо ба далели он ки, ба гуфтаи мақомот, имзои кофиро ҷамъ наовард, сабтином нашуд.

Зоиров пешниҳод кардааст, "қисми 2-и моддаи 65-и Конститутсияро тағйир диҳанд". Дар он гуфта шудааст, шахсе номзад ба президент мешавад, ки ҳадди ақал 5 дарсад аз афроди қобили раъй ба пешниҳоди номзадии ӯ имзо гузоранд. Зоиров гуфтааст, ин рақам ба 1 дарсад иваз карда шавад. "Ҳизбҳои сиёсие, ки дар интихоботи порлумонии соли 2020 аз 2 дарсад зиёд овози интихобкунандаҳоро ҷамъ кардаанд, аз ҷамъоварии имзо дар интихоботи президентӣ озод карда шаванд", - пешниҳод кардааст ӯ.

Ба қавли Зоиров, бояд интихоботи президентиро се моҳ пеш аз замони баргузориаш эълом кунанд, аммо қабл аз он тағйиру иловаҳои пешниҳодиро ба Конститутсия ва қонуни интихобот қабул кунанд.

Ҳар дафъа интихоботи президентӣ дар Тоҷикистон моҳи ноябр баргузор мешавад. Аз соли 1994 ба ин тараф дар чаҳор интихоботи президентӣ Эмомалӣ Раҳмон, раиси ҷумҳури кунунӣ пирӯз шудааст.

Аммо созмонҳои байнулмилалӣ интихоботҳои гузаштаро шаффофу демократӣ эътироф накардаанд ва мухолифон рақибони Раҳмонро воқеӣ надонистаанд.

Эмомалӣ Раҳмон ва писараш Рустами Эмомалӣ аз номзадҳои эҳтимолии интихоботи имсол гуфта мешаванд, вале падару писар ҳанӯз дар бораи иштирокашон дар корзори сиёсӣ ҳарфе нагуфтаанд. Президенти Тоҷикистон дар ҳафт сол як дафъа интихоб мешавад.

Рустами Эмомалӣ, писари калонии раисҷумҳури Тоҷикистон, бори дувум раиси Маҷлиси Миллӣ, палатаи болоии порлумон шудааст. Овоздиҳӣ рӯзи 11-уми апрел гузашт.

Маҷлиси Миллӣ 33 узв дорад ва аксари онҳо аз Ҳизби ҳокими халқӣ-демократӣ ҳастанд. 31 нафари онҳо ба ҷонибдорӣ аз Рустами Эмомалӣ раъй дода, ҳеч кас зид набаромадааст.

Тибқи Қонуни асосӣ раиси Маҷлиси Миллӣ шахси дувум дар ҳукумати Тоҷикистон аст ва дар сурати истеъфо, марг, беморӣ ё аз салоҳиятҳои худ даст кашидани президент, то замони интихобот, ӯ сарпарасти мақоми раёсатҷумҳурӣ хоҳад шуд.

Рустами Эмомалӣ аз моҳи апрели соли 2017 вакили маҷлис ва раиси шаҳри Душанбе аст. Аз соли 2020 вориди Маҷлиси Миллӣ шуд ва аз он замон раёсати табақаи болоии порлумонро ба дӯш дорад.

Аз ин қабл дар чанд вазифаҳои калидии дигар, аз ҷумла раҳбари Оҷонси мубориза бо фасод ва Хадамоти гумрук кор кардааст. Дар соли 2012 ва баъд аз генерал Сӯҳроб Қосимов раҳбари Федератсияи футболи Тоҷикистон интихоб шуд ва то ба ҳол дар ин мақом кор мекунад.

Як созмони ғарбӣ дар моҳи марти имсол гуфт, раисҷумҳури Тоҷикистон Эмомалӣ Раҳмон дар пайи "фароҳам кардани шароити мусоид" барои интиқоли қудрат ба писараш Рустами Эмомалист. Маркази Карнеги дар Берлин дар гузорише гуфт, ба ҳамин далел "то рафъи ҳама таҳдидҳои эҳтимолӣ, мумкин аст, поксозӣ идома кунад."

Эҳтимоли интиқоли қудрат аз раисҷумҳур Эмомалӣ Раҳмон ба Рустами Эмомалӣ чанд сол боз матраҳ аст. Ҳардуи онҳо дар ин замина ҳеч гоҳ изҳори назар накардаанд. Хайриддин Усмонзода, раиси Маркази тадқиқоти стратегӣ, як идораи вобаста аз раёсати ҷумҳури Тоҷикистон, дар моҳи июли соли 2024 сару садоро дар ин маврид бепоя хонда буд.

Галия Иброҳимова (Ибрагимова), пажӯҳишгари Маркази Карнеги дар Берлин, ҷавон кардани аъзои Маҷлиси Намояндагон, дигаргунӣ дар ниҳодҳои давлатӣ, ивазшавии раҳбарони ҳизбҳои сиёсӣ, зиндонӣ кардани баъзе аз шахсиятҳои маъруф, аз ҷумла хабарнигорону сиёсатмадорон ва мансабдорони пешинро аз ҷумлаи чораҳои раисҷумҳури Тоҷикистон барои интиқоли қудрат донистааст.

"Новобаста аз он ки Раҳмон барои ҳифзи вориси худ чӣ чора меандешад, ҳеч замонате нест, ки ӯ қудратро нигоҳ дошта метавонад. Дар низоми сиёсии Тоҷикистон ихтилофҳо зиёданд ва омодагӣ барои интиқоли қудрат бештари онҳоро шиддат мебахшад," – навиштааст Галия Иброҳимова.

Намояндагони мухолифон Эмомалӣ Раҳмонро, ки аз соли 1992 қудратро дар ихтиёр дорад ва борҳо барои монданаш дар ҳукумат ба Қонуни асосӣ тағйирот ворид кардааст, ба хешутаборбозӣ (непотизм) ва инҳисор (монополия)-и қудрат танқид мекунанд.

Ӯ падари 7 духтар ва 2 писар аст. Духтараш Озода Раҳмон раиси Дастгоҳи иҷроияи президенти Тоҷикистон аст. Рухшона Эмомалӣ сафири Тоҷикистон дар Бритониё ва Ирландияи Шимолӣ. Таҳмина Раҳмон, духтари дигари раисҷумҳур, ҳамроҳи шавҳараш Зарифбек Давлатов машғули тиҷорат. Ашрафҷон Гулов, домоди Раҳмон, сафири Тоҷикистон дар Имороти Муттаҳидаи Араб.

Раиси шаҳри Уш дар Қирғизистон пешниҳод кардааст, ки даромадани мошинҳо ба ин шаҳр пулакӣ шавад.

Ҷенишбек Токторбаев рӯзи 8-уми апрел гуфтааст, ҳар рӯз аз ноҳияҳои атроф ба шаҳри Уш қариб 56 ҳазор нақлиёт вориду хориҷ мешаванд.

Ба гуфтаи шаҳрдори Уш, мақомот метавонанд дар даромадгоҳи шаҳр истгоҳҳои зебо бино карда, аз мошинҳои воридмешуда маблағ ситонанд.

Токторбаев ин маблағро барои мошинҳои сабукрав 50-100 соми қирғизӣ ё 6-11 доллар ва барои боркашонҳо 100-150 сом ё 11-17 доллар пешбинӣ кардааст.

“Агар дар як рӯз 56 ҳазор нақлиёт ба шаҳр дароянд, пас, дар як рӯз 2,8 миллион сом ё 320 ҳазор доллар ва дар сол 60 миллион сом ё 6,8 миллион доллар ҷамъоварӣ кардан мумкин аст,” -- гуфтааст шаҳрдори Уш.

Ин мақомдори қирғиз афзудааст, пули ҷамъшуда барои бунёди мактаб, кӯдакистону беморхона ва беҳтар кардани бахши хидматрасонии шаҳри Уш сарф мешавад.

Пештар шаҳрдори Бишкек ҳам хоҳони ситондани маблағ аз мошинҳое шуд, ки ба пойтахт ворид мешаванд. Як ҳадаф аз ин тасмим пешгирӣ аз танбашавии нақлиёт дар пойтахти Қирғизистон гуфта шудааст.

Рӯзи 11-уми апрел дар шаҳри Душанбе аввалин ҷаласаи даъвати нави Маҷлиси миллӣ, палатаи болоии порлумон баргузор мешавад. Қарор аст дар ин маҷлис раиси палатаи болоии порлумон ва муовинони ӯ интихоб шаванд.

Маҷлиси миллӣ 33 узв дорад, ки 25 нафари он аз ҳисоби панҷ минтақаи кишвар ва 8 каси дигар аз сӯи президент таъйин мешаванд.

Аксар курсиҳои Маҷлиси миллӣ дар ихтиёри Ҳизби ҳокими халқии демократӣ аст. Аз соли 2020 Рустами Эмомалӣ, шаҳрдори Душанбе ва писари президент раиси Маҷлиси миллӣ аст ва эҳтимол меравад, ки ӯ дубора ба ин симмат интихоб шавад.

Тибқи қонуни асосии Тоҷикистон раиси Маҷлиси миллӣ шахси дуввуми Тоҷикистон аст ва дар сурати истеъфо ё вафоти раиси ҷумҳур ваколатҳои ӯ то интихобот ба уҳдаи роҳбари палатаи болоии порлумон мегузарад. Мунтақидон мегӯянд, Маҷлиси миллӣ тақрибан ҳама пешниҳодҳои ҳукуматро бидуни баҳсҳои сахт қабул мекунад.

Ҳукумати Тоҷикистон барои нушокиҳои нерӯдиҳанда, ки дар миёни ҷавонон бо номи "энергетик" маъруф аст, андози нав ҷорӣ кардааст.

Бар асоси қарор ҳукумат, аз 1-уми майи имсол, аз ҳар литр нӯшокии нерӯдиҳанда 0,06 евро ё қариб як сомонӣ андози аксиз гирифта мешавад.

Аксиз андозе аст, ки барои молҳои зараррасон ҷорӣ мешавад. Ҳанӯз мақомот нагуфтаанд, ки бо кадом далел барои нӯшокиҳои нерӯдиҳанда андози аксиз ҷорӣ карданд. Бархе пизишкон истифодаи ин навъ нӯшокиро барои саломатӣ зарарнок хонданд.

Бар асоси қарори ҳукумат, ки Радиои Озодӣ 11-уми апрел шинос шуд, аз 1-уми май меъёри андози аксиз барои чанд моли дигар ҳам зиёд мешавад. Аз ҷумла, барои як литр оби ҷав ё пиво 0,40 евро ё қариб 5 сомонӣ, майи табиӣ 0,84 евро ё қариб 10 сомонӣ ва барои як литр спирт 4 евро ё 48 сомонӣ муқаррар шудааст.

Меъёри аксиз барои ҳар тона бензин ҳам аз 55 евро то 70 евро боло бурда шуд.

Тибқи иттилои расмӣ, соли 2024 аз ҳисоби андози аксиз ба буҷаи Тоҷикистон 1,2 миллиард сомонӣ ворид шудааст.

Дар гузашта ин навъи андоз барои алоқаи мобилӣ норозигии бархе корбаронро ба миён оварда буд.

Сар аз имрӯз, 11-уми апрел, маҳдудият ё лимити барқ дар Тоҷикистон шабона аз байн бурда шуд. Дар ин бора Қурбон Аҳмадзода, сухангӯи ширкати "Барқи тоҷик" ба Радиои Озодӣ хабар дод.

Ба гуфтаи Аҳмадзода, дар тамоми Тоҷикистон сар аз 11-уми апрел шабона барқ хомӯш намешавад. Сухангӯи “Барқи тоҷик” афзуд, давоми як-ду рӯзи оянда ва бо зиёд шудани резиши об дар обанбори “Норак”, маҳдудияти барқ рӯзона ҳам аз байн бурда мешавад.

Маҳдудият ё лимити барқ дар Тоҷикистон аз моҳи сентябри соли 2024 ҷорӣ шуда буд. Тибқи ҷадвали Шабакаҳои тақсими барқ, сокинон дар минтақаҳои Тоҷикистон бояд аз соати 5 то 8-и субҳ ва аз 18 то 22-и шаб, яъне ҳафт соат, бо нерӯи барқ мегирифтанд.

Ҳарчанд бархе сокинон шикоят доштанд, ки ҳамин реҷа ҳам риоя намешавад. Маҳдудияти интиқоли барқ аз тирамоҳи соли гузашта ҷорӣ шуда буд ва бо фаро расидани гармиҳо сокинон мепурсиданд, магар ҳоло ҳам неругоҳҳо аз об пур нашудаанд?

Тибқи иттилои дарёфтии Радиои Озодӣ, ҳавопаймои ширкати эронии “Вориш” рӯзи 10-уми апрел дар Фурудгоҳи Душанбе нишасти "хатарнок" анҷом додааст. Мақомоти Тоҷикистон ва ширкат дар ин бора расман шарҳе намедиҳанд.

Як манбаи боварбахши Радиои Озодӣ дар Оҷонси авиатсияи шаҳрвандии Тоҷикистон гуфт, ҳавопаймои ширкати “Вориш”, ки аз Теҳрон ба Душанбе меомад, соати 11:14 дар Фурудгоҳи Душанбе бо мушкил нишаст.

Ба гуфтаи ҳамсуҳбати мо, ҳамаи мусофирон ва халабонҳо солиманд. Сабаби ба мушкил фуруд омадани ҳавопаймо бад будани вазъи боду ҳаво гуфта мешавад.

“Соати 11 дар Душанбе раъду барқ ва борон буд. Ҳавопаймои Душанбе барои нишасту парвози ҳавопаймо ду хат дорад. Ҳавопаймои ширкати “Вориш” дар байни ин ду хати парвоз фуруд омад ва зоҳиран чархаш осеб дид. Аз соати 11 ҳамаи парвозҳои рафтуо баргашт аз Фурудгоҳи Душанбе ва ба ин фурудгоҳ манъ шуд. Мутахассисон қариб даҳ соат талош карданд, ҳавопаймои ширкати “Вориш”-ро таъмир карда, аз хати парвоз берун кунанд ва танҳо баъди ин барои дигар парвозҳо иҷозат шуд,” -- гуфт ҳамсуҳбати мо дар Оҷонси авиатсияи шаҳрвандӣ.

Талошҳои мо барои гирифтани шарҳи расмӣ аз намояндагони Фурудгоҳи Душанбе бенатиҷа буд. Таблои онлайни Фурудгоҳи Душанбе нишон медиҳад, ки ҳамаи парвозҳо аз соати 11 то 20 лағв шудаанд. Рӯшан нест, ки ҳавопаймои эронӣ дар пайи нишасти хатарнок ба чӣ мушкил рубарӯ шудааст.

Тоҷикистон ва Эрон дар аввали имсол низоми раводидро миёни ду кишвар бекор карданд. Ҳоло байни ду кишвар ҳафтае 5 парвоз (чор парвоз аз ширкати “Вориш” ва як парвоз аз “Сомон Эйр”) анҷом мешавад.

Мақомоти Русия баъди се рӯзи нигаҳдорӣ беш аз 20 муҳоҷири тоҷикро аз фурудгоҳи "Внуково"-и Маскав ба Тоҷикистон ихроҷ кардаанд.

Муҳоҷирони тоҷик рӯзи 10-уми апрел бо ирсоли навор ба Радиои Озодӣ гуфтанд, ки се рӯз дар шароити бад қарор доштанд ва сабаби роҳ наёфтан ба Русияро низ касе барояшон шарҳ надод.

Дар ҳоле ки ба гуфтаи онҳо, тамоми санадҳояшон дуруст буд ва дар Русия ҳаққи иқомат доштанд.

Чанд рӯз пеш низ ба беш аз 500 муҳоҷири тоҷик дар марзи Қазоқистон бо Русия иҷозаи ворид шудан надода буданд. Ин муҳоҷирон мехостанд бо мошин ва аз роҳи заминӣ вориди Русия шаванд.

Ин гурӯҳи муҳоҷирон рӯзи 9-уми апрел хабар доданд, ки пас аз як ҳафта мақомоти рус ба онҳо иҷозаи вуруд ба Русияро додаанд.

Дар Русия ҳудуди як миллион муҳоҷири тоҷик кору зиндагӣ мекунанд ва ин кишварро барои сиёсати саркубгарона нисбат ба муҳоҷирон танқид мекунанд. Мақомоти Русия борҳо гуфтаанд, ки ҳадафашон рафъи қонуншиканиҳо ҳаст

Амрико ва Русия рӯзи 10-уми апрел дар шаҳри Абузабӣ, маркази Имороти Муттаҳидаи Араб, баъзе аз зиндониёнро иваз кардаанд.

Дар ин бора нашрияи “The Wall Street Journal” бо такя ба раиси созмони истихбороти марказии Амрико ё CIA хабар дод.

Ҷониби Русия то ҳол табодули зиндониёнро тасдиқ ё инкор накардааст.

Ба гузориши "The Wall Street Journal", Русия Ксения Карелинаро озод кардааст, ки шаҳрвандии Русия ва Амрикоро дорад.

Ӯ барои гузарондани як миқдор пул ба нерӯҳои мусаллаҳи Украина бо иттиҳоми "хиёнат ба давлат" ба 12 сол зиндон маҳкум шуда буд.

Вакили мудофеи Карелина тасдиқ кард, ки ӯ раҳо шудааст ва дар роҳ ба Иёлоти Муттаҳида аст.

Раҳоии ӯро котиби давлатӣ ё вазири умури хориҷии Амрико Марко Рубио низ таъйид намуд. Ба гуфтаи ӯ, Карелина дар Русия ноодилона боздошту маҳкум шудааст ва президенти Амрико Доналд Трамп “озодии ӯро фароҳам овард”.

Амрико шаҳрванди Олмону Русия Артур Петровро ба Маскав додааст.

Вай соли 2023 бо дархости Иёлоти Муттаҳида ва бо иттиҳоми интиқоли микроэлектроника ба Русия бар хилофи таҳримҳо дар Қибрис (Кипр) боздошт шуда буд.

Нишасти машваратӣ миёни ҳайатҳои Русия ва Амрико рӯзи 10-уми апрел дар Истанбул оғоз ёфт.

Вазорати корҳои хориҷии ҳарду кишвар пештар хабар дода буданд, ки дар ин баҳс ба "эътидол овардани кори намояндагиҳои дипломатӣ" дар Маскав ва Вашингтон мавзӯи асосист.

Музокирот дар консулгарии генералии Русия дар Истанбул мегузарад.

Ҳайати Русияро сафири ин кишвар дар Вашингтон Александр Дарчиев ва ҳайати Амрикоро муовини ёвари котиби давлатӣ дар умури Аврупо ва АвруОсиё Соната Коултер раҳбарӣ доранд.

Ин даври дуюми машваратҳо дар Истанбул аст. Даври аввал дар охири моҳи феврали имсол дар консулгарии генералии Амрико баргузор шуда буд.

Сухангӯйи Вазорати корҳои хориҷии Амрико рӯзи 9-уми апрел гуфт, ки "Украина дар барномаи нишаст нест".

Вай афзуд, дипломатҳо фақат ба масъалаи "барқарор кардани кори муътадили сафоратҳо таваҷҷуҳ мекунанд"

Кори сафоратҳои Амрико ва Русия дар хоки ҳамдигар дар солҳои охир пас аз рондани дипломатҳо ва маҳдудиятҳои гуногун ба таври чашмрас маҳдуд шудааст.

Тибқи пешбинии Бонки Осиёии Рушд, иқтисоди Тоҷикистон имсол 7,4 ва соли оянда 6,8 дарсад рушд хоҳад кард. Ин дар ҳолест, ки мақомоти тоҷик гуфтаанд, суръати рушди иқтисод имсол ва солҳои оянда аз 8 дарсад кам нахоҳад буд.

Дар гузориши Бонки Осиёии Рушд, ки дар аввали моҳи апрел нашр шуд, омадааст, сармоягузории бузург ба бахши энержӣ, саноат ва рушди бахши хусусӣ аз омилҳои асосии афзоиши иқтисод дар ду соли оянда хоҳад буд.

Ко Сакамото, намояндаи доимии Бонки Осиёии Рушд дар Тоҷикистон гуфтааст, ин ниҳоди молӣ омода аст, ки дар бахшҳои алоҳида, аз ҷумла, камбуди сармоя ва беҳтар кардани хизматрасонии давлатӣ, ба Тоҷикистон кӯмак кунад.

Тибқи пешбинии Бонки Осиёии Рушд, имсол сатҳи таваррум то 5 дарсад ва соли оянда то 5,8 дарсад боло хоҳад рафт.

Боло рафтани талабот ба қарзҳои истеъмолӣ, зиёд шудани маоши кормандони давлатӣ, нафақа ва хизматрасониҳои коммуналӣ, аз омилҳои асосии таваррум дар кишвар гуфта мешавад.

Бонки Осиёии Рушд ба Тоҷикистон тавсия додааст, ки технологияи рақамиро рушд диҳад, то хизматрасониҳои давлатӣ ва сатҳи зиндагии мардум беҳтар шавад.

Як зани тоҷик, ки бо шаш фарзанди ноболиғаш дар Русия танҳо монда буд, ба Тоҷикистон баргардонда шудааст.

Дар ин бора намояндагии Вазорати меҳнат ва муҳоҷирати Тоҷикистон дар Русия 9-уми апрел хабар додааст.

Ба қавли манбаъ, аз ташкилоти ҷамъиятии тоҷикон "Умед", давоми се моҳ ин модар ва кӯдаконашро нигоҳбин кардаанд.

Дар хабарномаи расмӣ омадааст, намояндагии Вазорати меҳнат ва муҳоҷирати Тоҷикистон дар Русия санадҳои зан ва фарзандонашро омода карда, бо дастгирии соҳибкорон билети бозгаштро барои онҳо хариданд.

Аммо мақомот дар бораи ин зан ва шаш фарзандаш маълумоти зиёд надоданд. Маълум нест, ки онҳо кай ба Русия рафта ва чаро бесарпараст мондаанд.

Тақрибан ҳар сол занон ва кӯдакони бесарпаноҳи тоҷикро аз Русия ба Тоҷикистон мефиристанд.

Чин барои молҳои воридотӣ аз Иёлоти Муттаҳида 84 дарсад боҷ ҷорӣ кард.

Ин иқдом рӯзи 10-уми апрел ба иҷро медарояд ва посух ба таърифа ё боҷҳоест, ки аз сӯйи Доналд Трамп, раисҷумҳури Амрико, ҷорӣ шуда, боис ба шиддат гирифтани ҷанги тиҷоратӣ миёни ду иқтисоди бузурги ҷаҳон гаштааст.

Таърифаҳои Амрико алайҳи Чин дар маҷмуъ ба 104 дарсад расид ва рӯзи 9-уми апрел ба иҷро даромад.

Вазорати тиҷорати Чин дар баёнияе гуфт, "агар Иёлоти Муттаҳида ба сахттар кардани маҳдудиятҳои иқтисодӣ ва тиҷоратӣ пофишорӣ кунад, Чин иродаи қавӣ ва василаҳои фаровоне дорад, ки чораҳои зарурӣ андешад ва то ба охир мубориза барад."

Нигарониҳо аз пайомади таърифаҳо боис ба "нооромӣ" дар бозори саҳом дар ҷаҳон шудааст, аммо ин ошуфтагӣ Трампро мутаассир накардааст. Вай баръакс гуфт, ки таърифаҳо "дору" ҳастанд ва аз ӯ мавқеи худ пас нахоҳад гашт.

Трамп рӯзи 8-уми апрел гуфт, кишварҳо "муштоқ"-и музокирот дар мавриди қарордодҳои тиҷоратии нав ҳастанд.

Скотт Бессент, вазири молияи Амрико, рӯзи 9-уми апрел чораи охири Чинро маҳкум кард. Ӯ дар мусоҳиба бо Fox Business Network гуфт, "мутаассифона, чиниҳо намехоҳанд биёянду музокира кунанд, зеро онҳо бадтарин хилофкорони низоми тиҷорати байнулмилалӣ ҳастанд."

Дар ҳамин ҳол, кишварҳои Иттиҳоди Аврупо дар Брюссел ҷамъ шуда, дар мавриди чораҳои мутақобил раъй доданд. Вашингтон ба молҳои Иттиҳоди Аврупо таърифаи 20-дарсадӣ ҷорӣ кардааст.

Радиои Аврупои Озод/Радиои Озодӣ тарҳи Иттиҳоди Аврупоро дид, ки аз 15-уми апрел ба иҷро медарояд ва тибқи он барои як зумра молҳои Амрико, аз ҷумла пӯлоду либосу хӯрок 25 дарсад боҷи изофӣ ҷорӣ шудааст.

Маъмурони милиса дар Кӯлоб талош кардаанд, ки як ҷавонро аз дохили бозори марказии шаҳр бо зӯр ба артиш баранд, аммо соҳибкорон монеъ шудаанд.

Ҳодиса рӯзи 8-уми апрел рӯй дод.

Дар наворе, ки ба дасти Радиои Озодӣ расид, яке аз маъмурон бо либоси мулкӣ мегӯяд, "ман шахсан барои бурдани ту омадаам. Бе даъватнома. Даъватномаро мон."

Кормандони милиса талош кардаанд, Амирҷон Бухориевро аз дукони модараш, соҳибкор Раҷаббӣ Одинаева ба артиш баранд.

Наздиконаш рафтори намояндагони мақомотро таҳқиромез хонданд. Дар иваз кормандони милиса ба дари дукони онҳо муҳр задаанд.

Азиз Бухориев, бародари Амирҷон, рӯзи 9-уми апрел ба Радиои Озодӣ гуфт, "мо сад дарсад розием, ки бародарам ба хидмат равад. Чаро дар ҷойи ҷамъиятӣ чунин карданд ва дукони моро бастанд? Мо андоз (молиёт) месупорем, зиндагиямон пеш меравад. Як гурӯҳ ҷамъ шуда, таҳқиромез мехоҳанд сарбоз гиранд. Ман хидмат кардаам ва бародарам ҳам ба артиш меравад. Инҳо бе даъватнома бо таҳқир ин корро карданиянд."

Як манбаъ дар Шуъбаи корҳои дохилии Кӯлоб бе зикри номаш ба Радиои Озодӣ гуфт, аз ин ҳолат хабар надоранд, аммо дастур гирифтаанд, ки дар доираи қонун дар сафарбар кардани ҷавонон ба артиш саҳм гузоранд.

Дар Тоҷикистон мавсими баҳории даъвати ҷавонон (аз 18 то 27-сола) ба артиш ҷараён дорад.

Мақомоти вилояти Хатлон рӯзи 1-уми апрел эълон карданд, ки нақшаи даъватро иҷро карданд, аммо ҳанӯз аз ҷалби маҷбурӣ ё бо зӯр ба артиш бурдани ҷавонон аз ин минтақа ва гӯшаҳои дигар шикоят мерасад.

Дар пайи фурӯ рафтани сақфи як клуби шабона дар Ҷумҳурии Доминикан 98 кас ҷон бохта, 160 нафар захмӣ шудаанд.

Ҳодиса рӯзи 8-уми апрел рух додааст.

Ба гузориши хабаргузориҳо, маъмурони наҷот ҳамчунон дар ҳоли берун овардани ҷасадҳои қурбониён аз зери харобаҳо ҳастанд.

Гузориш шудааст, ки сақфи бино дар вақти як консерт фурӯ рафт.

Теъдоде аз сиёсатмадорон, варзишгарон ва шахсони дигар дар консерт ҳузур доштанд.

Доминикан як ҷумҳурии ҷазираӣ аст, ки дар Амрикои Шимолӣ ҷойгир шудааст.

Дар ҳамлаи нерӯҳои Русия ба вилояти Днепри Украина 15 кас захмӣ шудааст.

Дмитрий Лисак, волии вилоят, гуфт, бесарнишинҳои Русия шаби 8 ба 9-уми апрел ҳамла карданд ва бинои баландошёна зарар дид.

Артиши Русия ҳамчунин ба вилоятҳои Харков ва Краматорск зарба задааст. Дар Харков ду кас захмӣ шудааст.

Дар ҳамин ҳол Вазорати дифои Русия хабар додааст, ки шаби 9-уми апрел бесарнишинҳо ба зиёда аз 10 минтақаи ин кишвар ҳамла карданд.

Ба ҳисоби Вазорати дифои Русия, 158 паҳпод бар фарози минтақаҳои Краснодар, Ростов ва Осетияи Шимолӣ нобуд шудаанд. Тасдиқи дурустии ин маълумот душвор аст.

Дар фурудгоҳҳои Владикавказ, Волгоград ва Грозний маҳдудият ҷорӣ кардаанд.