Толибони силоҳбадаст вилояти шимолии Қундузи Афғонистонро, ки дар марз бо Тоҷикистон қарор дорад, иҳота кардаанд.
Полиси ин вилоят мегӯяд, 20-уми июн Толибон амалиёт дар Қундузро оғоз намуда, нисфирӯзии 21-уми июн маркази устонро иҳота карданд. Иномуддин Раҳмонӣ - сухангӯйи полиси Қундуз иброз дошт, ки қароргоҳи полис таҳти контроли Толибон аст ва онҳо дар масофаи тахминан як километр аз маркази маъмурии ин вилоят- шаҳри Қундуз, қарор доранд. Тибқи иттилои ҳамин манбаъ, Толибон роҳҳои пайвасткунандаи вилояти Қундуз бо дигар манотиқи Афғонистонро зери тасарруф қарор додаанд.
Толибон ҳамчунон минтақаи Имомсоҳиб, воқеъ дар марз бо Тоҷикистонро ишғол кардаанд, ки дар интиқоли молу коло аз Осиёи Марказӣ аҳамияти бузург дорад. Баъди оғози беруншавии нерӯҳои эътилофи байналмилалии зери раҳбарии ИМА, Толибон даҳҳо ноҳияро ишғол намуданд. Сухангӯйи Толибон Забиҳулло Муҷоҳиб тасдиқ кард, ки минтақаи Имомсоҳиб зери назорати Толибон аст. Ӯ афзудааст, ки Толибон то ҳол амалиёт дар шаҳри Қундузро шурӯъ накардаанд.
