Дастаи мунтахаби футболи наврасони то 17-солаи Тоҷикистон дар қисми ниҳоии Ҷоми Осиё-2025, ки аз 3-юм то 20-уми апрел дар Арабистони Саудӣ баргузор мешавад, ширкат меварзад.
Рақибони мунтахаби наврасони Тоҷикистон (U-17) дар гурӯҳи «D» дастаҳои Эрон, Уммон ва Кореяи Шимолӣ мебошанд.
Футболбозони навраси тоҷик нахустин бозиашонро дар Ҷоми Осиё-2025 рӯзи 5-уми апрел бо тими наврасони Уммон анҷом медиҳанд. Дар даври дуюми мусобиқа наврасони тоҷик 8-уми апрел бо ҳамсолони худ аз Кореяи Шимолӣ вориди рақобат мешаванд. Дар даври ниҳоии марҳилаи гурӯҳӣ 11-уми апрел дастаи наврасони Тоҷикистон бо тими Эрон рӯбарӯ хоҳад шуд.
Мутахассиси итолиёӣ Марко Раҷини, сармураббии дастаи мунтахаби наврасони Тоҷикистон (U-17), дар бораи рақибонаш гуфт, “мо дар марҳилаи интихобӣ дар Сингапур бо дастаи Уммон бозӣ карда будем. Дастаи хуб аст. Тими Эрон низ барои мо ба хубӣ ошност, чунки дар мусобиқаҳои Ассотсиатсияи футболи Осиёи Марказӣ чандин маротиба бо ҳам вохӯрдаем ва бозиҳои мо ҳамеша душвор мегузаштанд. Дар мавриди мунтахаби Кореяи Шимолӣ бошад, гуфтаниам, ки ин даста дар марҳилаи интихобӣ дар як гурӯҳ бо Эрон бозӣ карда, бо ҳисоби 4:1 пирӯз шудааст. Ҳамин тавр, дар Арабистони Саудӣ мо бо дастаҳои қавӣ рақобатҳои хеле душвор хоҳем дошт.”
Ба ҳайати дастаи мунтахаби наврасони Тоҷикистон (U-17) барои ширкат дар қисми ниҳоии Ҷоми Осиё-2025 23 бозигар – 3 дарвозабон, 7 ҳимоятгар, 10 нимҳимоятгар ва 3 ҳамлагар – дохил шудаанд:
Дарвозабонҳо: Муҳаммадраҳим Раҳмонов, Анушервон Қурбонзода, Абубакр Раҳмонқулов;
Ҳимоятгарон: Абдусамад Меликмуродов, Садриддин Сатторов, Меҳроҷиддин Розиқов, Мустафо Ҳасанбеков, Аҳмадҷон Шоев, Шуҳрат Нурматов, Мубориз Мискиншоев;
Нимҳимоятгарон: Баҳодур Назарзода, Абдулло Иброҳимзода, Рамазон Бахталиев, Зариф Зарифзода, Парвиз Бобоназаров, Умед Ҷафоев, Фурқон Раҳимзода, Ҳайдаршо Худойдодов, Меҳрубон Одилзода, Давид Мақсудов;
Ҳамлагарон: Муҳаммад Назриев, Абдуқаюм Фузайлов, Назрулло Ашурализода;
Бар асоси қуръакашӣ, шонздаҳ даста ба чаҳор гурӯҳ тақсим шудаанд:
гурӯҳи «А» - Арабистони Саудӣ, Узбекистон, Тайланд, Чин;
гурӯҳи «В» - Ҷопон, Австралия, Ветнам, Имороти Муттаҳидаи Арабӣ;
гурӯҳи «С» - Кореяи Ҷанубӣ, Яман, Афғонистон, Индонезия;
гурӯҳи «D» - Эрон, Тоҷикистон, Уммон, Кореяи Шимолӣ.
Баъд аз анҷоми марҳилаи гурӯҳӣ аз ҳар гурӯҳ ду дастаи беҳтарин ба даври чорякниҳоии Ҷоми Осиё-2025 роҳ меёбанд. Ҳамаи иштироккунандагони даври чорякниҳоӣ соҳиби роҳхат ба қаҳрамонии ҷаҳон-2025 миёни наврасон мешаванд, ки аз 5-ум то 27-уми ноябр дар Қатар доир мегардад.
Ҷоми Осиё-2025 байни дастаҳои мунтахаби наврасон (U-17)
Гурӯҳи «D»
Эрон
Тоҷикистон
Уммон
Кореяи Шимолӣ
Даври 1-ум
5-уми апрел (шанбе)
Оғози бозӣ – соати 20:00 бо вақти Душанбе
Тоҷикистон - Уммон
Ҷидда, варзишгоҳи Шоҳзода Абдулло Ал-Файсал
Даври 2-юм
8-уми апрел (сешанбе)
Оғози бозӣ – соати 20:00 бо вақти Душанбе
Кореяи Шимолӣ - Тоҷикистон
Ҷидда, варзишгоҳи Шоҳ Абдулло Спортс Сити Холл
Даври 3-юм
11-уми апрел (шанбе)
Оғози бозӣ – соати 22:15 бо вақти Душанбе
Эрон - Тоҷикистон
Ҷидда, варзишгоҳи Шоҳзода Абдулло Ал-Файсал
Ду нафар аз Тоҷикистон - довари FIFA Абдулло Давлатов ва ёвари довари FIFA Вафо Қараев - ба рӯйхати довароне, ки бозиҳои қисми ниҳоии Ҷоми Осиё-2025 миёни дастаҳои наврасони то 17-соларо ҳакамӣ мекунанд, шомил шудаанд.
