Дар сурати пирӯзӣ ин размикори 25-солаи тоҷик шонси ба UFC роҳ ёфтанро пайдо мекард. Аммо пас аз 9 ғалабаи пайиҳам ин аввалин бохти Доробшоҳ Наботов буд.
Ӯ қаблан рақобати худро моҳи ноябри соли гузашта муқобили Мурод Биларов дар мусобиқаи AMC Fight Nights 122 анҷом дода буд. Ин рақобат бо қарори якдилонаи доварон ба фоидаи Доробшоҳ анҷом ёфт.
Матеус Камило бошад, охирин бор моҳи октябри соли равон дар мусобиқаи Tuff-N-Uff 139 муқобили Ҷонаски Соҷо рақобат карда, бо қарори якдилонаи доварон пирӯзӣ ба даст оварда буд. Матеус 10 рақобат гузаронида, 8 ғалаба ва 2 бохт дорад.
Ёдовар мешавем, Доробшоҳ Наботов бо тарзи ғайримаъмулӣ хост, ки шомили ташкилоти UFC шавад. UFC яке аз созмонҳои маъруф аст, ки ба гузаронидани муҳорибаҳои омехта (ММА) машғул аст.
Доробшоҳ 24-уми октябри имсол дар нишасти хабарии UFC дар шаҳри Абузабии Имороти Муттаҳидаи Арабӣ аз Дана Уайт, роҳбари ташкилоти UFC, хост, барояш муҳориба диҳад. Вай ба Дана Уайт гуфт, дар муҳорибаҳои омехта 9 муҳориба гузаронида, дар ҳамааш пирӯз шудааст. Президенти UFC, ки ин варзишгари тоҷикро намешинохт, ӯро ба наздаш хонда, дар бораи корномааш дар муҳорибаҳои омехта пурсид.
Ба Доробшоҳ дар ташкилоти “Дана Уайт Контендер Сериез” (DWCS) муҳориба пешниҳод карданд. Дар сурати ғалаба рӯзи 14-уми декабр дар Кореяи Ҷанубӣ роҳаш ба UFC боз мешуд.
Доробшоҳ Наботов устоди варзиш дар риштаҳои ММА, панкратион ва самбои размӣ мебошад. Вай соли 2017 қаҳрамони Русия дар риштаи панкратион гардида, соли 2019 дар қаҳрамонии Аврупо дар ММА ғолиб шудааст.
То ин дам чор варзишгар аз Тоҷикистон - Нурулло Алиев, Муҳаммад Наимов, Лоиқ Раҷабов ва Муин Ғафуров - бо ташкилоти UFC қарордод бастаанд. Чанд варзишгари дигари тоҷик дар Bellator ҳам баромад мекунанд.
Гуфтугӯ