Бунёди идораи амволи давлатии Қирғизистон манзили президенти пешини ин кишвар Алмосбек Отамбоевро дар деҳаи Кой-Тош ба ихтиёри давлат гирифт. Дар ин бора Медер Машиев, муовини мудири Бунёди идораи амволи Қирғизистон хабар дод. Машиев гуфт, ин манзил рӯзи 30-юми май ба тавозун (баланс)-и давлат дароварда шуд.
Дар наворе, ки дар шабакаҳои иҷтимоӣ нашр гардид, дида мешавад, вакилони мудофеи Алмосбек Отамбоев бо кормандони Бунёди идораи амволи давлатӣ баҳс доранд. Аз наздикони Отамбоев дархост шуд, ки давоми се рӯз манзилро холӣ кунанд.
"Мо бо талаби қонунӣ инҷо омадем, ин амволи давлат аст", - гуфт Канат Рисқулов, намояндаи дигари Бунёди амволи давлатии Қирғизистон.
Сергей Слесарев, вакили мудофеи Отамбоев гуфт, ки хонаводаи президенти пешин дар бораи давлатӣ кардани манзил огоҳӣ надошт.
"На мо, на хонаводаи президенти пешин ҳеч санади тасдиқкунанда надорем. Санаде ба мо диҳед, ки мо онро баҳо дода тавонем. Ҳоло шумо мегӯед, ки ин манзил давлатӣ аст. Дар кадом асос? Бе ҳузури Отамбоев шумо санад тартиб додед", - гуфт Слесарев.
Рӯзи 23 июни соли 2020 додгоҳи ноҳияи Якуми майи шаҳри Бишкеки Қирғизистон Отамбоевро ба 11 солу 2 моҳи зиндон, бо мусодираи амвол маҳкум кард. Отамбоевро дар озодсозии ғайриқонунии соҳибнуфузи ҷиноӣ Азиз Батукаев аз зиндон айбдор карданд.
